თბილისი:
მანჩესტერი:
31-08-2018, 00:49
ავტორი: Dato Sirabidze,
ნანახია: 1548,
კომენტარები: 49
ჟოზე მოურინიო - დამნაშავე თუ უდანაშაულო ?
მწვრთნელი, რომელსაც უღალატეს...
ჟოზე მოურინიო - დამნაშავე თუ უდანაშაულო ?
27 მაისი, 2016 წელი - ჟოზე მოურინიო “მანჩესტერ იუნაიტედის” მთავარ მწვრთნელად დაინიშნა !

ედ ვუდვორდი: “ყველაფერი მარტივადაა, ჟოზე მოურინიო მსოფლიოში საუკეთესო მენეჯერია და მოხარული ვართ, რომ ის ჩვენთანაა”

ჟოზე მოურინიო: “მანჩესტერ იუნაიტედის” მწვრთნელობა ჩემთვის განსაკუთრებული ჯილდოა, მისტიკა და რომანი, რომელსაც ვერც ერთი სხვა გუნდი ვერ შეედრება”

27 აგვისტო, 2018 წელი - “მანჩესტერ იუნაიტედი” Vs “ტოტენჰემ ჰოთსპური” 0-3

გულშემატკივრები: “Mourinho Out”

ჟოზე მოურინიო: “დღეს დავრწმუნდი, რომ საუკეთესო შემფასებლები არიან გულშემატკივრები. დღეს ჩვენ წავაგეთ, მაგრამ ისინი ტაშს გვიკრავდნენ, რატომ ? იმიტომ რომ ეს დავიმსახურეთ. გახსოვთ “სევილიასთან” მარცხი ? მათ ჩვენ დაგვისტვინეს და ეს სრულიად სამართლიანი იყო, მაგრამ ისინი ხომ საუკეთესო შემფასებლები არიან, მათ იციან, რომ დღეს ჩვენ ბოლომდე ვიბრძოლეთ, ყველაფერი გავაკეთეთ. მე წავაგე 0-3, მაგრამ იცით რას ნიშნავს ეს 3 ? დიახ, ეს ნიშნავს რომ ჩვენ სამი გოლი გავუშვით და წავაგეთ, მაგრამ სამი, ეს ნიშნავს, რომ მე 3-ჯერ მოვიგე პრემიერ ლიგა, ანუ იმაზე მეტჯერ, ვიდრე ეს დანარჩენი 19 გუნდის მწვრთნელმა ერთად გააკეთა, მათ ანგარიშზე 2 პრემიერ ლიგაა, ჩემს ანგარიშზე კი 3, გამოიჩინეთ უფრო მეტი პატივისცემა”


სად და რა მომენტში დაიძაბა ჟოზე მოურინიოსა და გულშემატკივრებს შორის ურთიერთობა ? ვინ არის ამ ყველაფერში დამნაშავე ? რა უნდა მოხდეს შემდეგ ?

ჩემ მიერ ზემოთ მოყვანილ კომენტარებს შორის სხვაობა სულ რაღაც 2 წელია. 2017 წლის 24 მაისს ჟოზე მოურინიომ “მანჩესტერ იუნაიტედს” “ევროპა ლიგა” მოაგებინა, ეს ჯერჯერობით ბოლო ტიტულია, რომელიც მან გუნდს მოაგებინა, მას შემდეგ 1 წელზე ოდნავ მეტია გასული, თუმცა გულშემატკივრები ორად არიან გაყოფილნი და ერთნი მოურინიოს გაშვებას ითხოვენ, მეორენი კი იმას, რომ მას დრო მიეცეს. რა თქმა უნდა, დრო სწრაფად გადის, გულშემატკივრების მოლოდინები და შეხედულებები იცვლება, მათ ხომ ყოველთვის მეტი სურთ…

ჩემი ლოგიკის გასავითარებლად პარალელებს “ლივერპულის”, “ჩელსის” ,“მანჩესტერ სიტის” და “ტოტენჰემის” მწვრთნელებთან გავავლებ. ვნახოთ, თუ რა დროა გასული ამ გუნდის მწვრთნელების ბოლოს მოპოვებული ტიტულებიდან:

პეპ გვარდიოლა: 1 თვეზე ნაკლები (ბოლო ტიტული - “კომუნიტი შილდი”, აგვისტო, 2018 წელი)

იურგენ კლოპი: 3 წელი

მაურისიო სარი: მაურისიო სარიმ “ჩელსი” სულ ახლახანს ჩაიბარა და მასთან პარალელის გავლება ალბათ ნაკლებად საინტერესოა, მაგრამ “ჩელსიში” ამ მწვრთნელისგან ნამდვილად ელიან ბევრს. მიუხედავად ამ მცირე დროისა, მას მაინც შეეძლო მოეპოვებინა პირველი ტიტული “ჩელსის” მთავარი მწვრთნელის რანგში, მაგრამ მისი გუნდი “უემბლიზე” გვარდიოლას “სიტისთან” დამარცხდა, ისე კი 28 წლიან სამწვრთნელო კარიერაში სარის არასდროს მოუგია ტიტული და ერთადერთი მისი მთავარი მიღწევა იტალიის ჩემპიონატში მეორე ადგილზე გასვლაა.

მაურისიო პოჩეტინო: 3 წელი

ჟოზე მოურინიო: 15 თვე (ბოლო ტიტული - “ევროპის ლიგა”, მაისი, 2017 წელი)

ჟოზე მოურინიოს სტატისტიკა ამ მხრივ კატასტროფული ნამდვილად არ არის. მოდით ამ მონაცემებს მივუმატოთ ისიც, თუ რა რაოდენობის თანხა დახარჯეს ამ მწვრთნელებმა დღემდე:

იურგენ კლოპი - 440 მილიონი ევრო (3 სრული სეზონი, 0 ტიტული)
პეპ გვარდიოლა - 600 მილიონი ევრო (2 სრული სეზონი, 3 ტიტული)
მაურისიო პოჩეტინო - 350 მილიონი ევრო (3 სრული სეზონი, 0 ტიტული)
ჟოზე მოურინიო - 371 მილიონი ევრო (2 სრული სეზონი, 3 ტიტული)

2018 წლის ზაფხულის სატრანსფერო ფანჯარაზე კარგად მოგეხსენებათ, რომ გუნდს ხმაურიანი ტრანსფერი არ განუხორციელებია. “იუნაიტედის” გულშემატკივრების ნაწილი კი იმასაც ამბობს, რომ მოურინიომ უკვე დახარჯა საკმარისი თანხა და ეს თანხა სრულიად არის საკმარისი იმისთვის, რომ გუნდის განახლების და გადახალისების პროცესი საბოლოოდ დასრულებულიყო და გუნდს უმაღლესი პოზიციებისთვის საბოლოოდ დაეწყო სტაბილურად ბრძოლა. ასეა კი ეს ნამდვილად ?

პეპ გვარდიოლამ 2016/17 წლებში კლაუდიო ბრავო და ნოლიტო შეიძინა, თუმცა “სიტის” ხემლძღვანელობას ნამდვილად არ განუცხადებია უარი გვარდიოლასთვის და მისთვის გუნდმა კვლავ შეიძინა მეკარე (ედერსონი) და შემტევი (გაბრიელ ჟეზუსი)

იურგენ კლოპმა 2016 წელს ლორის კარიუსი და რაგნარ კლავანი მოიყვანა, მატიპი გუნდს თავისუფალი აგენტის სტატუსით შუერთდა, მაგრამ არც ლივერპულის ხელმძღვანელობას განუცხადებია უარი კლოპისთვის და მათ გერმანელი სპეციალისტის მოთხოვნით მცველში სარეკორდო თანხა გადაიხადეს (საუბარია ვირჯილ ვან დაიკზე), შემდეგ ესეც არ იკმარეს და სარეკორდო თანხის სანაცვლოდ გუნდში მეკარეც მოიყვანეს, თუმცა შემდეგ ეს რეკორდი მალე დაემხო (საუბარია ალისონ ბეკერზე, რომელიც კეპა არიზაბალაგას “ჩელსიში” გადასვლამდე მსოფლიოს ყველაზე ძვირადღირებული მეკარე გახლდათ). იურგენ კლოპმა ლორიუს კარიუსი ლიგის ფინალში კარში დააყენა, საბოლოოდ ამ არჩევანმა მას ფინალი წააგებინა, რაგნარ კლავანი კი ბევრს ნამდვილად არ ახსოვს, მან უკვე დატოვა “ლივერპული”.

“იუნაიტედის” გულშემატკივრები ხშირად იშვერენ თითს ჟოზე მოურინიოსკენ და ამბობენ, რომ ფეხბურთელები, რომლებიც შეცდომებს უშვებენ სწორედ მისი მოყვანილია და მას ამ მხრივ საწუწუნო არაფერი აქვს, რადგან გუნდმა ჟოზეს ისედაც უკვე ბევრი “დაახარჯა”.

ჟოზე მოურინიომ მოიყვანა ზლატან იბრაჰიმოჩი, რომელმაც გუნდისთვის ძალიან ბევრი გააკეთა და ორი ტიტული მოუტანა (კომუნიტი შილდი და ლიგის თასი), ჰენრიხ მხითარიანი, რომელმაც გუდს ევროპის ლიგა მოუტანა, რის შემდეგადაც ის გაცილებით მაღალი კლასის ფეხბურთელში გაიცვალა (საუბარია ალექსის სანჩესზე, რომელიც გუნდმა უფასოდ შეიძინა). ნემანია მატიჩი, პოლ პოგბა და რომელუ ლუკაკუ არიან ფეხბურთელები, რომლებზეც ვფიქრობ, რომ კომენტარის გაკეთება არ ღირს, რადგანაც ვიმედოვნებ, რომ რომელიმე მათგანის შეძენაში გულშემატკივრები ჟოზეს არ ადანაშაულებენ. ერიკ ბაიი არის ფეხბურთელი, რომელიც გულშემატკივართა ძალიან დიდ ნაწილს უყვარს და გულშემატკივრობს, თუმცა “ბრაიტონთან” მატჩის შემდეგ ბევრმა ეს ტრანსფერიც არასწორად მონათლა. ვიქტორ ლინდელოფი ჩემი აზრით არის მოურინიოს ერთადერთი შენაძენი, რომელიც ნამდვილად ვერ ამართლებს, თუმცა კი კარგი მცველია, რომელსაც ყველაფერი აქვს იმისთვის, რომ დიდი მცველი გახდეს. ახლა კი კითხვა, არის კი ერთი ტრანსფერის, მოდი დავარქვათ ვერ გამართლება იმის საფუძველი, რომ გუნდმა და გულშემატკივარმა მწვრთნელს უარი განუცხადოს იმავე პოზიციაზე კიდევ ერთი ფეხბურთელის მოყვანაზე ? რა თქმა უნდა არა, ამის არგუმენტად ზემოთმოყვანილი მაგალითებიც გამოდგება !

ვუდვორდმა მოურინიო 2016 წელს იმ მიზნით მოიყვანა, რომ უპირველეს ყოვლისა გუნდი ჩემპიონთა ლიგის ზონაში რეგულარულად მომხდარიყო. პირველ სეზონში მოურინიომ ვუვდორდს და ხელმძღვანელობას ეს დავალება შეუსრულა, გუნდი ჩემპიონთა ლიგაზე დააბრუნა და დამატებით 2 ტიტულის მოგებაც მოახერხა. შემდეგ იყო ზაფხულის სატრანსფერო ფანჯარა და ივან პერიშიჩი, ანუ ის ფეხბურთელი, რომელიც გუნდმა მოურინიოს ვერ/არ მიუყვანა. შეგვიძლია თუ არა მოვნათლოთ ეს შემთხვევა პირველ ღალატად მოურინიოსა და ვუდვორდის ურთიერთობაში ? დამეთანხმებით, რომ ეს შესაძლებელია და არ იქნება გადამეტებული. 2017/18 სეზონი გუნდმა კარგად ჩაატარა, ვთანხმდებით, რომ ნებისმიერ სხვა დროს ეს გუნდი ჩემპიონი გახდებოდა, რადგანაც “მანჩესტერ სიტიმ” ძალიან ძლიერი სეზონი ჩაატარა პრემიერ ლიგაში. ვუდვორდი და ხელმძღვანელობა ამას კარგად ხედავდა და იანვრის მიწურულს კიდეც გაუხანგრძლივა კლუბმა პორტუგალიელს კონტრაქტი. შემდეგ იყო თებერვალი, საოცარი მატჩები “კრისტალ პალასის”, “ჩელსის” და “ლივერპულის” წინააღმდეგ და შემდეგ მარცხი “სევილიასთან”...

2018 წლის 13 მარტი იყო კატასტროფა როგორც “იუნაიტედისთვის, ასევე მოურინიოსთვის. ამ მარცხის შემდეგ მოურინიომ ნამდვილად დაკარგა გულშემატკივართა დიდი ნაწილი და ალბათ ფეხბურთელებიც, ალბათ ხელმძღვანელობაც… აღნიშნული სეზონი გუნდმა მეორე პოზიციაზე დაასრულა, თასის ფინალში კი “ჩელსისთან” დამარცხდა. წინ იყო ზაფხულის სატრანსფერო ფანჯარა და ყველასთვის იყო ნათელი, რომ მოურინიოს კარიერისთვის ეს იქნებოდა უმნიშვნელოვანესი სეზონი და ის ყველაფერს გააკეთებდა თავის გადასარჩენად, ამისთვის კი მას სჭირდებოდა ფეხბურთელები. პრობლემური წერტილები კარგად ვიცოდით, ნათელი იყო, რომ გუნდს დაცვის ცენტრში აუცილებლად სჭირდებოდა ფეხბურთელი, გუნდს ფეხბურთელი სჭირდებოდა განაპირა ფლანგებზე, გვახსოვს ისიც, თუ როგორ დაესწრო მოურინიო რუსეთისა და ავსტრიის ეროვნული ნაკრებების შეხვედრას და გვახსოვს ისიც, თუ ვის აკვირდებოდა იგი ამ მატჩზე (საუბარია მარკო არნაუტოვიჩზე). საბოლოოდ, სატრანსფერო ფანჯრის დახურვის შემდეგ ჟოზე მოურინიოს შერჩა (სწორი სიტყვაა) მომავლის იმედი (დიოგო დალო) და ფრედი (რომელიც “იუნაიტედმა” “სიტის” გამოგლიჯა), არანორმალურად გაძლიერებული “ლივერპული” და ისედაც ძალზედ ძლიერი “სიტი” რიად მაჰრეზით.

ახლა კი მოდი ვიკითხოთ, ვინ როგორი გუნდი ჩაიბარა თავის დროზე ?

პეპ გვარდიოლა - 2016 წელი, ჩაიბარა “სიტი”, რომელმაც ჩემპიონთა ლიგის ნახევარფინალში შეძლო გასვლა, მოიგო ლიგის თასი და დაასრულა სეზონი ოთხეულში.

იურგენ კლოპი - 2015 წელი, ჩაიბარა “ლივერპული”, გუნდი, რომელმაც 2014 წელს ლამის მოიგო ნანატრი პრემიერ ლიგა (თუმცა ამაში ხელი სწორედ ჟოზე მოურინიომ შეუშალა)

მაურისიო პოჩეტინო - 2015 წელი, ჩაიბარა გუნდი, რომელიც დღეს უკვე სხვა დონეზეა, თუმცა მოლოდინები “ტოტენჰემში” არასდროსაა მაღალი და ეს ყველამ კარგად ვიცით.

ჟოზე მოურინიო - 2016 წელი, ჩაიბარა გუნდი, რომელმაც ვერ დაძლია ჩემპიონთა ლიგის ჯგუფური ეტაპი, გავიდა მე-5 პოზიციაზე ჩემპიონატში და მოიგო ფედერაციის თასი “კრისტალ პალასის” წინააღმდეგ.

ზემოთჩამოთვლილიდან ალბათ ყველა ვთანხმდებით, რომ ყველაზე რთულ საქმეს ხელი პორტუგალიელმა მოჰკიდა,“იუნაიტედი” უდიდესი მასშტაბების გუნდია უდიდესი მოთხოვნებით. კითხვები არც იმაზე უნდა ისმებოდეს, იყო თუ არა ეს გუნდი ახლად გადასაწყობი, რადგანაც “იუნაიტედი” ნამდვილად იყო გადასახალისებელი. პირველ სეზონში მოურინიომ ეს გადახალისება ბაიით, პოგბათი და მხითარიანით დაიწყო (არ ჩავთვალოთ იბრაჰიმოვიჩი), ანუ ფეხბურთელებით, რომლებიც მომავალში აუცილებლად იქნებიან გუნდის სასტარტო 11-ში (მხითარიანი ალექსისით ჩავანაცვლოთ), მეორე სეზონში მოურინიომ ნემანია მატიჩი, რომელუ ლუკაკუ და ვიქტორ ლინდელოფი მოიყვანა, თუ ლინდელოფის შეძენა შეცდომად მოვნათლეთ (მე მაინც მგონია, რომ შვედი მომავალში აუცილებლად ათამაშდება და მინიმუმ სკამისთვის ის კარგი ვარიანტია), ნემანია მატიჩი და რომელუ ლუკაკუ სასტარტოს ფეხბურთელები არიან. მესამე სეზონის წინ მოურინიოს შემადგენლობა დაახლოებით ასეთი იყო:

დავიდ დე ხეა - ეშლი იანგი, ერიკ ბაიი,კრის სმოლინგი (ფილ ჯონსი), ანტონიო ვალენსია - ნემანია მატიჩი, პოლ პოგბა - ალექსის სანჩესი, ჯესი ლინგარდი, ხუან მატა - რომელუ ლუკაკუ

ამ შემადგენლობაში მოურინიოს საკუთარი 5 ფეხბურთელი ჰყავს, მესამე სეზონში კი იმედოვნებდა, რომ მისი სასტარტო თერთმეტეული ასეთი იქნებოდა:

დავიდ დე ხეა - ალექს სანდრო, ერიკ ბაიი, ტობი ალდერვეირელდი, ანტონიო ვალენსია - ნემანია მატიჩი, პოლ პოგბა - ალექსის სანჩესი, ჯესი ლინგარდი, გარეტ ბეილი - რომელუ ლუკაკუ

არ არის არა ცუდი შემადგენლობა ? რა თქმა უნდა, დამეთანხმებით რომ არა. ზემოთ აღვნიშნე, რომ მოურინიოს ძირითადი შემადგენლობიდან საკუთარი 5 ფეხბურთელი ჰყავდა, მესამე სეზონში, ანუ სეზონში, სადაც მას კიდევ უფრო კარგი შედეგებისთვის უნდა ებრძოლა მას ძირითადში კვლავ 5 ფეხბურთელი ჰყავს…

როგორ განვლო ეს პროცესი გვარდიოლამ ?

ჰარტი - სანია,ოტამენდი,კომპანი,კლიში - ფერნანდო,ფერნანდინიო - ნავასი,სილვა,დე ბრუინი - აგუერო

საჩემპიონო სეზონში გვარდიოლამ 380 მილიონი ევრო დახარჯა, გადაახდევინა კლუბს სარეკორდო თანხები მცველებში და საბოლოოდ მიიღო შემდეგი:

ედერსონი - მენდი,ოტამენდი,კომპანი,უოლკერი - ფერნანდინიო, გუნდოგანი - სანე,სილვა,დე ბრუინი - აგუერო/ჟეზუსი

არ დაგვავიწყდეს როგორ ძლიერ სურდა გვარიდოლას ჟორჟინიოს შეძენა ფერნანდინიოს სანაცვლოდ, ასეთ შემთხვევაში მას ძირითადში საკუთარი 6-7 ფეხბურთელი ეყოლებოდა, თუმცა მან მთლიანად გამოცვალა “სიტის” როგორც ძირითადი, ასევე სათადარიგო ფეხბურთელები.

იურგენ კლოპს სრული 3 წელი დაჭირდა იმისთვის, რომ მიეღო ის გუნდი, რომელიც მას დღეს ჰყავს. შესაძლოა ჩვენ ვილაპარაკოთ იმ სარეკორდო თანხაზე, რაც მოურინიომ გუნდს პოგბაში გადაახდევინა, მაგრამ არ დაგვავიწყდეს სარეკორდო თანხად შეძენილი ვან დაიკი და ალისონი.

ზემოთ აღვნიშნე, რომ “სევილიასთან” მარცხის შემდეგ ურთიერთობა მოურინიოსა და გულშემატკივრებს შორის ნამდვილად გაფუჭდა, აღვნიშნე, რომ ურთიერთობა გაფუჭდა მოურინიოსა და ხელმძღვანელობას შორისაც, მაგრამ ერთი მარცხი ღირს კი ამად ? იურგენ კლოპმა პირველ სეზონში ლიგის თასის ფინალი წააგო, წააგო ევროპა ლიგის ფინალი, ვერ გაიყვანა იმ სეზონში გუნდი ევროთასების ზონაში, მეორე წელს გუნდი სრულიად იყო თავისუფალი ევროპული შეჯიბრებებისგან, მაგრამ კლოპმა ხელმძღვანელობა მხოლოდ ოთხეულით დააჯილდოვა, მესამე წელს გუნდი კვლავ ოთხეულში გავიდა და რაც ღირებული გააკეთა იყო ის, რომ ჩემპიონთა ლიგის ფინალში გავიდა, ამასთან გავიხსენოთ, კლოპის რეკორდები სათასო მატჩებში - ინგლისში ის თითქმის პირველივე ტურიდანვე ეთიშება სათასო გათამაშებებს - ყველაფერ ამის მიუხედავად მოითხოვა გულშემატკივარმა კლოპის გაშვება ? არა, ხელმძღვანელობამ უარი განუცხადა მხარდაჭერაზე ? არა, უტიტულო მწვრთნელს გუნდმა და გულშემატკივარმა სრული მხარდაჭერა გამოუცხადა და საბოლოოდ ამ ლოდინმა მოიტანა ის, რომ ახლა კლოპმა იპოვა და შეკრა ის გუნდი, რომელსაც შეუძლია ბევრის მიღწევა. პირველად კარიერაში გვარდიოლამ სეზონი მესამე პოზიციაზე დაასრულა, ვერ მოიგო ვერაფერი, გამოვარდა “მონაკოსთან”, შეიტანა გულშემატკივარმა ან ხელმძღვანელობამ ეჭვი იმაში, რომ შესაძლოა გვარდიოლა უკვე კრიზისშია და ის არასწორი კანდიდატურაა ? არა, აქაც გუნდი მწვრთნელს ბოლომდე დაუდგა გვერდში, დახარჯა ძალიან დიდი თანხები და მიიღო ის შედეგი, რაც ყველამ ვიცით.

ჟოზე მოურინიო აღარ არის ტოპ მენეჯერი და ის დასრულებულია, სიმართლეა ? მოდი ფაქტებით ვილაპარაკოთ. ბოლოს ჟოზე მოურინიომ ინგლისი დუბლით დაიპყრო და ეს 3 წლის წინ იყო, ბოლო ტიტული, რომელიც მან მოიპოვა იყო მხოლოდ და მხოლოდ 15 თვის წინ, ბოლო ფინალი, რომელიც მან ითამაშა იყო დაახლოებით 3 თვის წინ, ბოლო პოზიცია ჩემპიონატში, რომელიც მან დაიკავა იყო მე-2. ტოპ მწვრთნელებთან გასულ სეზონში მოურინიოს ასეთი სტატისტიკა ჰქონდა:

პეპ გვარდიოლა - 1 მოგება, 1 წაგება
მაურისიო პოჩეტინო - 2 მოგება, 1 წაგება
იურგენ კლოპი - 1 მოგება, 1 ფრე
ანტონიო კონტე - 1 მოგება, 2 წაგება
არსენ ვენგერი - 2 მოგება

როგორც ვხედავთ მოსაზრება იმის თაობაზე, რომ ჟოზე მოურინიო როგორც მწვრთნელი დასრულებულია საკამათაო და გადაჭრით ვერავინ იტყვის, რომ მოურინიო მართლაც დასრულდა და ვეღარაფერს მიაღწევს.

როგორია ფეხბურთის დონე, ის ხომ ანტიფეხბურთს თამაშობ ?

დღევანდელ ფეხბურთში ასეთი რეალობაა, არიან მწვრთნელები, რომლებიც სანახაობრივი ფეხბურთით აღწევენ შედეგს და არიან მწვრთნელები, რომლებიც უპირატესობას პრაგმატულ ფეხბურთს ანიჭებენ. გვახსენდება პეპ გვარდიოლა, რომელიც თავს სანახაობრივი ფეხბურთითაც იწონებს და შედეგებითაც, გვახსენდება პოჩეტინო და კლოპი, რომლებიც სანახაობრივ ფეხბურთს თამაშობენ, მაგრამ შედეგს ვერ დებენ, გვახსენდება სიმეონე და ალეგრი, რომლებიც უპირატესობას პრაგმატულ ფეხბურთს ანიჭებენ და საჭირო შედეგსაც დებენ. სად არის მოურინიო ? მოურინიო პრაგმატული ფეხბურთის მოყვარულია და ეს ყველამ კარგად იცის. "იუნაიტედის" გულშემატკივრები ითხოვენ სანახაობრივ და შედეგიან ფეხბურთს, მაგრამ რამდენია ამ მომენტისთვის ისეთი მწვრთნელი, რომელიც მოურინიოს გათავისუფლების შემთხვევაში ერთდროულად შემოგვთავაზებს როგორც სანახაობრივ, ასევე შედეგიან ფეხბურთს ? დამეთანხმებით, რომ ამ მომენტისთვის ასეთი ბევრი არავინაა.

"იუნაიტედის" გულშემატკივრებმა იცოდნენ, თუ როგორ ფეხბურთს თამაშობდა ჟოზე მოურინიო და ამისთვის მზად ჯერ კიდევ მაშინ უნდა ყოფილიყვნენ, როდესაც ხელმძღვანელობამ პორტუგალიელი მთავარ მწვრთნელად დანიშნა. ჟოზე მოურინიო ფეხბურთის სპეციალისტია, რომელმაც უდიდეს წარმატებებს მიაღწია, ამიტომ ცოტა გასაკვირია, თუ რატომ უკვირთ გულშემატკივრებს მოურინიოს ასეთი სათამაშო სტილი. მოურინიო არ არის დამნაშავე იმაში, რომ ის ფეხბურთს ასე ხედავს, კითხულობს და ასე ათამაშებს გუნდს, დამნაშავე აქ უფრო ხელმძღვანელობაა, ვიდრე მოურინიო, რადგანაც კარგად იცოდა 2016 წელს ვუდვორდმა, თუ როგორ ფეხბურთს ითამაშებდა გუნდი მოურინიოს მოწვევით.

ვერდიქტი - დამნაშავეა თუ უდანაშაულო ?

"მანჩესტერ იუნაიტედი" ასოცირდება პირველობასთან და გულშემატკივრები წლების განმავლობაში მიჩვეულნი იყვნენ ამ პირველობასთან, გამარჯვებასთან. ყველანი ვთანხმდებით, რომ ფერგიუსონი უნდა დავივიწყოთ, რადგან მეორე ფერგიუსონი მსოფლიო ფეხბურთს აღარ ეყოლება. რა ხდება პოსტფერგიუსონის ერაში ? ჩვენ ვიხილეთ მოიესის და ვან გაალის "იუნაიტედი", გაცილებით უარესი, შერცხვენილი გუნდი, არანაირი სათამაშო სტილით და არანაირი შედეგით. გულშემატკივართა ნაწილი ამბობს, რომ მოურინიომ "იუნაიტედი" კიდევ უფრო დაანგრია, მაგრამ ეს სიმართლეა ? ფერგიუსონის შემდეგ "იუნაიტედის" სტანდარტები დაეცა, განადგურდა, ჟოზე მოურინიოს მოსვლის შემდეგ კი ეს სტანდარტები კვლავ აიწია და ამაში დამნაშავე სწორედ მოურინიოა, რადგანაც თუმცა კი მოიხსენებენ მას დასრულებულ მწვრთნელად, მაინც აქვთ გარკვეულწილად იმის იმედი და მოლოდინი, რომ ის გაიმარჯვებს.

სწორედ მაშინ, როცა მწვრთნელს ყველაზე მეტად სჭირდებოდა ხელმძღვანელობის მხარდაჭერა, ხელმძღვანელობამ ის უარით გაისტუმრა და გუნდი პირდაპირ გაუშვა რისკისკენ. ნათელი იყო, რომ არაჯანსაღი გარემო აუცილებლად იქონიებდა ზეგავლენას და ეს ყველაფერი პირველ სამ ტურში კარგად გამოჩნდა. ვინ არის ამაში დამნაშავე ? ერთპირონულად - ხელმძღვანელობა.

სამი წლის თავზე მოურინიოს არ ჰყავს "ჟოზე მოურინიოს "მანჩესტერ იუნაიტედი", სამი წლის თავზე ჟოზე მოურინიოს ჰყავს სერ ალექს ფერგიუსონის, ლუი ვან გაალის და დევიდ მოიესის + ჟოზე მოურინიოს მანჩესტერ იუნაიტედი. მოურინიო იმსახურებდა მეტ მხარდაჭერას, მითუმეტეს, როცა ამის საფუძველი მან ხელმძღვანელობას მისცა. გულშემატკივრები უნდა ემდუროდნენ ჟოზე მოურინიოს სათამაშო სტილზე, მაგრამ არა შედეგებზე, რომლებიც მან დადო.

გიფიქრიათ, ვის შეეძლო ჩაებარებინა "იუნაიტედი" 2016 წელს ? ვინ იყო ის თავისუფალი მწვრთნელი, რომელიც აიღებდა თავის თავზე ნომერ პირველ პრობლემურ სამუშაოს, მოვიდოდა გუნდში, გადაახალისებდა ამ გუნდს, ითამაშებდა ლამაზ ფეხბურთს და დადებდა იმ საოცნებო შედეგებს, რომლებზეც დღეს ასე ოცნებობს ბევრი ? შემიძლია დაგელოდოთ...

"ბრაიტონთან" მატჩის შემდეგ გუნდის ბევრმა ლეგენდამ გააკეთა კომენტარი და მათგან ალბათ გარი ნევილის სიტყვები ყველაზე უფრო კარგად იტყვის ჩემს საბოლოო სათქმელს:

"შენ არ შეგიძლია ააშენო სახლი ნახევრად და შემდეგ იქ საცხოვრებლად შეხვიდე. თუ შენ შენს მენეჯერს კონტრაქტს უხანგრძლივებ, ვალდებული ხარ მას ბოლომდე გვერდში დაუდგე"
სტატიები
49 კომენტარი
№49
ავტორი: Shota Blues
6 სექტემბერი 2018 14:46
  • სიახლეები: 0
  • კომენტარები: 67
ციტატა: Dato Sirabidze
ძაან ტეხავს, როცა არც სიტყვების მარაგი გაქვს და არც შეფასების კულტურა და შენს ჩამოყალიბებულ აზრში მხოლოდ "*ლიადს" და "*ირს" იყენებ, ეგ უკვე ბევრზე მიუთითებს...

არანაირი პრობლემა არ მაქვს, თუ მეტყვიან, რომ გრამატიკულად გაუმართავი სტატიაა, თუ მეტყვიან რომ ფაქტებს ვამახინჯებ და ბევრ რამეს რასაც შესასწორებელია შემისწორებენ !

მე მოვიყვანე ფაქტები, მოვიყვანე "ვაიფანის" - გარი ნევილის კომენტარი... პრეტენზია შეგიძლია გამოთქვა იმ ფაქტებზე, რომლებიც მე სტატიაში მოვიყვანე და მითხრა, თუ რომელია მათგან არასწორი, მაგრამ მათგან ყველა სწორია და ამის გადამოწმებაც შეიძლება...რაც შეეხება ჩემ მიერ ჩამოყალიბებულ შეხედულებას/აზრს, ჩვენ ინდივიდები ვართ და ყველას საკუთარი მოსაზრება გაგვაჩნია, შენ შეიძლება მოგწონდეს ეს მოსაზრება ან არა, ეთანხმებოდე ან არა...

მაგრამ როდესაც "*ლიად" და "*ირობა" საუბარს ვერ ვცდებით, უნდა ვიცოდეთ, რომ "*ლიად" და "*ირობის" ენით დაგველაპარაკება სხვა !

"თუ "იუნაიტედმა" გადაწყვიტა, რომ არ დახარჯოს მეტად ფული, მოურინიომ უნდა მიბაძოს პოჩეტინოს, რომელიც "ტოტენჰემში" წელსაც იმ შემადგენლობით თამაშობს რა შემადგენლობაც გასულ სეზონში ჰყავდა"

სტატიაში დავწერე, რომ გულშემატკივრებს უფლება აქვთ ემდუროდნენ ჟოზეს სათამაშო სტილზე მეთქი, ასევე ისიც დავწერე, რომ ამაში მოურინიოს ბრალია ნაკლებადაა, რადგან ეს კაცი ასე თამაშობდა სულ...თავიდან არ მოეყვანათ მაშინ და იმედია მეთანხმები

რაც შეეხება იმას, რომ მოურინიომ პოჩეტინოს მიბაძოს...მიბაძავს პოჩეტინოს, ეგ არაა პრობლემა, მაგრამ განსხვავება რაშია იცი ? მართალი ხარ, რომ პოჩეტინო ფეხბურთს თამაშობს, მაგრამ მოუყვანენ თუ არ მოუყვანენ მას ფეხბურთელებს, სეზონის ბოლოს 0 ტიტულით მას არაფერს მოთხოვენ, ჟოზე მოურინიოს კი სეზონის ბოლოს კი არ მოთხოვენ, გაუშვებენ და იმედია ამაშიც მეთანხმები...

და საერთოდ, პოჩეტინო ჩემთვის იდეალური კანდიდატურაა მომავალი მანჩესტერისთვის, ზიდანზე მეტად მინდა ეს კაცი, მაგრამ მოურინიო პოჩეტინოს ვერ მიბაძავს, რადგან პოჩეტინო გაცილებით ნაკლები წნეხის და მოთხოვნების ქვეშაა, მაშინ როცა მოურინიოს სეზონის ბოლოს შედეგს სთხოვენ, წინააღმდეგ შემთხვევაში კი გუნდიდან გაუშვებენ

გენაცვალე ძმაო! მე პირადად მადლიერი ვარ შენი ამ საიტზე მოღვაწეობით, ვაფასებ იმ შრომას რა დროსაც სტატიების წერას ანდომებ...
0
№48
ავტორი: Dato Sirabidze
2 სექტემბერი 2018 19:03
  • სიახლეები: 358
  • კომენტარები: 346
ციტატა: JuanMata
მოურინიოს არ აკრიტიკებენ დაცვითი ფეხბურთის თამაშის გამო, ყველა შევეგუეთ ამ ფაქტს და ვიცით რომ შედეგი ყველაზე მნიშვნელოვანია. მოურინიოს აკრიტიკებენ იმის გამო, რომ გუნდის თამაშში არ შეინიშნება არანაირი პროგრესი. გუნდს ბრაიტონთან ნორმალურად დაცვიდან ამოსვლა არ შეუძლია და არაა ბრაიტონი გუნდი, რომელსაც მესი და რონალდო ჭირდება, რომ ნორმალურად შეუტიო.
?[/b]


როგორ დაგეთანხმო, რო გუნდის თამაშში პროგრესი არ შეინიშნება ? როგორ დაგეთანხმო რო სისტემაშია მთლიანად პრობლემა ? როდესაც გუნდს სისტემური პრობლემები აქვს, მაშინ როგორ ახერხებს ასეთი გუნდი ჩემპიონატში ისეთ გუნდებზე წინ გასვლას, რომელთაც ასეთი პრობლემები არ აქვს შენი თქმით ? (ტოტენჰემი, ლივერპული და ა.შ), როდესაც გუნდს ასეთი პრობლემები აქვს 4 ფინალს როგორ თამაშობს ?

გუნდში არიან ადამიანები, რომლებიც ჩემზე გაცილებით კარგად ერკვევიან ფეხბურთში, მე არ ვარ ფეხბურთის სპეციალისტი და ჩვენიდან არც ბევრი სხვა, იმ ხალხმა კარგად იცის, რომ პრობლემა მხოლოდ მოურინიოში არაა, თორემ დღეს, 2 სექტემბერს მოურინიო გუნდში აღარ იქნებოდა...

მაგალითისთვის ლივერპული მოგყავს - დაცვა და მეკარე, მე კი გეტყვი, რომ მოურინიოს გუნდში დაცვა, განაპირა მცველი და ვინგერია პრობლემური და ეს ფეხბურთელები სჭირდება, რომ ჰყავდეს ჩემპოონობისთვის იბრძოლებდა...

ჩემი სათქმელი ასეთია, მაგრამ ბევრმა ვერ ამოიკითხა რასაც ვამბობ:

ფერგიუსონის მერე არის ყველაზე ძლიერი იუნაიტედი, ფერგიუსონის მერე გუნდმა ყველაზე დიდი პროგრესი განიცადა და ეს მოურინიოს დამსახურებაა, მე არ ვიძახი, რომ მოურინიო არაფერშია დამნაშავე, მე ვიძახი, რომ მოურინიო ყველაფერში არაა დამნაშავე და წარუმატებლობის წილი მოდის ხელმძღვანელობასა და ფეხბურთელებზეც...

მე ვიძახი, რომ როდესაც ახალ სეზონს იწყებ იმავე მწვრთნელით, მას კიდეც უნდა მიუყვანო ის ფეხბურთელები, რომლებიც მან მოითხოვა, თუ ამას არ აპირებ, გაუშვი სეზონის დაწყებამდე...პრობლემებია მენეჯმენტშიც, რადგანაც საფეხბურთო ამბებში ვუდვორდი არ არის წარმატებული და მცოდნე, მოედნის გარეთ კი, ძაან სერიოზული მიღწევები აქვს...

მე არ ვამბობ ამას, ბევრი ამბობს, რომ დღევანდელი მდგომარეობაა მხოლოდ მოურინიოს ბრალი არაა, ასე რომ არ იყოს, ჩვენ ტელევიზორით ვუყურებთ ფეხბურთს, ხოლო გულშემატკივრები რომლებიც უკანასკნელ ცენტებს იხდიან და ბილეთს ყიდულობენ, მატჩის შემდეგ მოურინიოს და გუნდს ტაშს არ დაუკრავდნენ, რადგანაც ფაქტია, რომ პრობლემები ღრმაა...

და საერთოდ, ისიც ფაქტია, რომ სხვადასხვა მოსაზრებები გვაქვს, მაგრამ ორივეს წარმატებული მანჩესტერ იუნაიტედი სურს...

მოურინიოს გუნდი იყო ძლიერი და მძიმე დაცვაში და სწრაფი კონტრშეტევაზე, ასეთი გუნდი მან აქ ვერ შეკრა/არ შეაკრევინეს... და ბოლოს...:

მოურინიოს მოსვლამდე იყო ცუდი იუნაიტედი, მოურინიოს მოსვლით გახდა უკეთესი იუნაიტედი, მოურინიო წავა, მაგრამ ისე, რომ არაფერს გააფუჭებს, მოურინიოს წასვლის შემდეგ მომავალ მწვრთნელს ექნება უკეთესი პირობები და მოურინიოს წასვლის შემდეგ ვიხილავთ უკეთესს იუნაიტედს !
0
_ _ _ _ _ _ _ _ _ _ _ _ _ _ _ _ _ _ _ _ " There is a mystique and a romance about it which no other club can match" - Jose Mourinho
№47
ავტორი: Lev
2 სექტემბერი 2018 11:30
  • სიახლეები: 0
  • კომენტარები: 1247
ციტატა: JuanMata
მოურინიოს არ აკრიტიკებენ დაცვითი ფეხბურთის თამაშის გამო, ყველა შევეგუეთ ამ ფაქტს და ვიცით რომ შედეგი ყველაზე მნიშვნელოვანია. მოურინიოს აკრიტიკებენ იმის გამო, რომ გუნდის თამაშში არ შეინიშნება არანაირი პროგრესი. გუნდს ბრაიტონთან ნორმალურად დაცვიდან ამოსვლა არ შეუძლია და არაა ბრაიტონი გუნდი, რომელსაც მესი და რონალდო ჭირდება, რომ ნორმალურად შეუტიო.

კლოპმა ვერაფერი მოიგო, მაგრამ პირველივე თამაშებიდან შეეტყო ლივერპულს, რომ თამაში იცვლებოდა, და რაც დრო გადიოდა უფრო და უფრო უმატებდა გუნდი. მიუხედავად ძალიან ცუდი დაცვისა გუნდმა მოახერხა და დაბრუნდა ჩემპიონთა ლიგაზე, იქმნებოდა შთაბეჭდილება რომ ამ გუნდს ჭირდება კარგი მცველი, მეკარე და უკვე შეუძლია სერიოზულ ტიტულებზე გაწევა.

მანჩესტერის თამაშში არ არის ეს შეგრძნება, გუნდში არაა ის სიტუაცია, როცა ერთი და ორი ცუდი შემსრულებელი გიფუჭებს საქმეს (როგორც ლივერპულში კლავანი და კარიუსი მაგალითად), აქ მთელ თამაშის სისტემაშია პრობლემა. ფეხბურთელები ჩვენთან რეგრესირებენ, ვერც ერთ ფეხბურთელს ვერ ვიხსენებ ახლა, რომელიც უკეთეს თამაშს აჩვენებს ჩვენთან, ვიდრე წინა გუნდში. ისინიც კი ვინც ჟოზემდე აქ იყვნენ უფრო ცუდაად თამაშობენ.

ლივერპულს ჰქონდა კონკრეტული პრობლემა - დაცვა, და გააძლიერა. მანჩესტერში ძალიან რთულია კონკრეტულ პრობლემეზე ისაუბრო:

დაცვა ცუდად მოქმედებს
პოზიციური შეტევა არ გვაქვს საერთოდ
შეტევაში ფლანგები მკვდარია
ცენტრში მოწინააღმდეგეს ვერ ვაჩერებთ და მუდმივად უკან გვახევინებს
მომენტებს ვერ ვქმნით
დაცვიდან ამოსვლა და სწრაფ შეტევაზე გადავსლა არ გამოგვდის,
სტანდარტებზე ძალიან ცოტა გაგვაქვს და ძალიან ბერვს ვუშვებთ.

ფაქტიურად მთელი გუნდი უნდა გამოცვალო. მაგრამ აქაც პრობლემაა - ვიყიდეთ ლინდელოფი, მცველი, კარგი პასით და მოედნის ხედვით, რომელიც კარგად ამოდის დაცვიდან, მაგრამ პრობლემა დარჩა. ვიყიდეთ მატიჩი, რომელსაც კედელევით ეჭირა ჩელსის ცენტრი, მაგრამ ჩვენი ცენტრი მაინც ქვიშის ქანდაკებასავით იშლება, ვიყიდეთ სანჩესი, რომელსაც შეტევაში მეტი სიმწვავე უნდა შემოეტანა და უარესი დაემართა გუნდს, ვიყიდეთ ლუკაკუ, რომელიც ევერტონში პაჭკებად აწყობდა გოლებს, საკუთარი ქვეყნის ყველა დროის საუკეთესო ბომბარდირია 24 წლის ასაკში და გოლის გატანის პრობლემა მაინც დარჩა გუნდს. - იქნებ საქმე მარტო ფეხბურთელებში არაა?

P.S. ერთი კითხვა მაქვს - მანჩესტერის წარუმატებლობა არის ედ ვუვდორდის, გლეიზერების, ფეხბურთელების, გულშემატკივრების ბრალი. ყველასი გარდა მწვრთნელისა.
როგორია თეორიულად მოვლენების განვითარების ის სცენარი, სადაც დამნაშავე იქნება ჟოზე მოურინიო?

საღოლ ძმაო. იმენა დახატე ყველაფერი ერთ კომენტარში საღოლ!
0
_ _ _ _ _ _ _ _ _ _ _ _ _ _ _ _ _ _ _ _ Glory Man united!
№46
ავტორი: JuanMata
2 სექტემბერი 2018 02:50
  • სიახლეები: 13
  • კომენტარები: 1471
მოურინიოს არ აკრიტიკებენ დაცვითი ფეხბურთის თამაშის გამო, ყველა შევეგუეთ ამ ფაქტს და ვიცით რომ შედეგი ყველაზე მნიშვნელოვანია. მოურინიოს აკრიტიკებენ იმის გამო, რომ გუნდის თამაშში არ შეინიშნება არანაირი პროგრესი. გუნდს ბრაიტონთან ნორმალურად დაცვიდან ამოსვლა არ შეუძლია და არაა ბრაიტონი გუნდი, რომელსაც მესი და რონალდო ჭირდება, რომ ნორმალურად შეუტიო.

კლოპმა ვერაფერი მოიგო, მაგრამ პირველივე თამაშებიდან შეეტყო ლივერპულს, რომ თამაში იცვლებოდა, და რაც დრო გადიოდა უფრო და უფრო უმატებდა გუნდი. მიუხედავად ძალიან ცუდი დაცვისა გუნდმა მოახერხა და დაბრუნდა ჩემპიონთა ლიგაზე, იქმნებოდა შთაბეჭდილება რომ ამ გუნდს ჭირდება კარგი მცველი, მეკარე და უკვე შეუძლია სერიოზულ ტიტულებზე გაწევა.

მანჩესტერის თამაშში არ არის ეს შეგრძნება, გუნდში არაა ის სიტუაცია, როცა ერთი და ორი ცუდი შემსრულებელი გიფუჭებს საქმეს (როგორც ლივერპულში კლავანი და კარიუსი მაგალითად), აქ მთელ თამაშის სისტემაშია პრობლემა. ფეხბურთელები ჩვენთან რეგრესირებენ, ვერც ერთ ფეხბურთელს ვერ ვიხსენებ ახლა, რომელიც უკეთეს თამაშს აჩვენებს ჩვენთან, ვიდრე წინა გუნდში. ისინიც კი ვინც ჟოზემდე აქ იყვნენ უფრო ცუდაად თამაშობენ.

ლივერპულს ჰქონდა კონკრეტული პრობლემა - დაცვა, და გააძლიერა. მანჩესტერში ძალიან რთულია კონკრეტულ პრობლემეზე ისაუბრო:

დაცვა ცუდად მოქმედებს
პოზიციური შეტევა არ გვაქვს საერთოდ
შეტევაში ფლანგები მკვდარია
ცენტრში მოწინააღმდეგეს ვერ ვაჩერებთ და მუდმივად უკან გვახევინებს
მომენტებს ვერ ვქმნით
დაცვიდან ამოსვლა და სწრაფ შეტევაზე გადავსლა არ გამოგვდის,
სტანდარტებზე ძალიან ცოტა გაგვაქვს და ძალიან ბერვს ვუშვებთ.

ფაქტიურად მთელი გუნდი უნდა გამოცვალო. მაგრამ აქაც პრობლემაა - ვიყიდეთ ლინდელოფი, მცველი, კარგი პასით და მოედნის ხედვით, რომელიც კარგად ამოდის დაცვიდან, მაგრამ პრობლემა დარჩა. ვიყიდეთ მატიჩი, რომელსაც კედელევით ეჭირა ჩელსის ცენტრი, მაგრამ ჩვენი ცენტრი მაინც ქვიშის ქანდაკებასავით იშლება, ვიყიდეთ სანჩესი, რომელსაც შეტევაში მეტი სიმწვავე უნდა შემოეტანა და უარესი დაემართა გუნდს, ვიყიდეთ ლუკაკუ, რომელიც ევერტონში პაჭკებად აწყობდა გოლებს, საკუთარი ქვეყნის ყველა დროის საუკეთესო ბომბარდირია 24 წლის ასაკში და გოლის გატანის პრობლემა მაინც დარჩა გუნდს. - იქნებ საქმე მარტო ფეხბურთელებში არაა?

P.S. ერთი კითხვა მაქვს - მანჩესტერის წარუმატებლობა არის ედ ვუვდორდის, გლეიზერების, ფეხბურთელების, გულშემატკივრების ბრალი. ყველასი გარდა მწვრთნელისა.
როგორია თეორიულად მოვლენების განვითარების ის სცენარი, სადაც დამნაშავე იქნება ჟოზე მოურინიო?
1
№45
ავტორი: Lolasha
31 აგვისტო 2018 20:26
  • სიახლეები: 0
  • კომენტარები: 23
თავიდანვე ვიძახდი რომ მოუს ბრალი არ იყო არაფერი და ამ აზრზე დავრჩები ბოლომდე... ამ კაცზე უკეთესს და გამოცდილს ვერ მოვიყვანთ ვერავის და ეხლა ექსპერიმენტების დრო არაა რომ სათავეში ემიუს ზიდანი ჩაუდგეს (მიუხედავად მისდამი დიდი პატივისცემისა და ჩემპიონთა ლიგაზე მის მიერ საოცრების მოხდენისა) ან თუნდაც გიგზი და ასისტენტად სკოულზი.. მთავარია ეხლა იუნაიტედმა ეს კრიზისი გადააგოროს და ევრო სარბიელზეც დაამტკიცოს რო სიტყვა ეთქმის (ეჭვი არ გვეპარება ამაში, უბრალოდ ბოლო წლებიდან გამომდინარე ვიძახი). ასე რომ მოუს ჯობია საჭირო ხალხი მოუყვანონ.
პ.ს. ძალიან კარგი სტატიაა, ყოჩაღ.
1
№44
ავტორი: Lev
31 აგვისტო 2018 17:20
  • სიახლეები: 0
  • კომენტარები: 1247
ბზიკი გეთანხმები კარგად მესმის შენი ძმა. ჩემთვის ზიდანი არ არი წამალი და არც არავინ. წინასწარ ვერ გაიგებ. მაგრამ, ის რომ სეზონის ბოლომდე ვინმე ჩვენიან ძველს ჩავაბაროთ და ვნახოთ. 100 პროცენტით ვიცი რომ მოურინიოზე უკეთესად წელს ყველა გაუძღვება გუნდს, და იმიტომ კი არა რომ მოურინიოზე უკეთესები არიან. უბრალოდ ფეხბურთელებისთვის იქნება სიახლე და სტიმული და ვნახოთ იქნებ როგორ თამაშობენ. ბოლო ბოლო ხომ ვხედავთ რომ რაც არ უნდა მაგარი მწვრთნელი იყოს მოურინიო, თავზე ენგრევა გუნდი, მოედანზე კარგად ჩანს რომ ამ კაცმა გასახდელში დაკარგა უკვე წონა და ეს პროცესი შეუქცევადია არავის ჰქონდეს იმის ილუზია რომ გუნდი ევროთასების ზონას მიუახლოვდება თუ გასახდელში მწვრთნელმა ნდობა დაკარგა და ფეხბურთელებს არ მოწონთ ვარჯიშები და ტაქტიკა, თუ ეს ყველაფერი ასეა უკვე რამდენიმე თამაშში გამოჩნდება. უბედურება ის არის რომ ვერცერთხელ ვერ გავრისკეთ მანჩესტერელი მწვრთნელად და ეხლა...მგონი დრო მოდის. არიან ვარიანტები(სქოულზი და კერიკი) და ვაცადოთ ბიჭებს. ბოლოსდაბოლოს კლუბის ტრადიციებს სცემენ პატივს და თავს გადაახტებიან ოღონდ გულშემატკივარი ისევ გაახარონ მწვრთნელის რანგში...და კიდე. დაანებეთ ვუდვორდს თავი...არ ესმის ფეხბურთი მაგ კაცს
0
_ _ _ _ _ _ _ _ _ _ _ _ _ _ _ _ _ _ _ _ Glory Man united!
№43
ავტორი: Malboro463
31 აგვისტო 2018 16:59
  • სიახლეები: 0
  • კომენტარები: 4292
ჩელსის და მანიუს კაი შემადგენლობას დაბრალებს უხარისხო თამაშს მარა რელალს მეორე ნომრად რომ ათამაშებდაესეც შემადგენლობის ბრალი იყო? მე კარლოს ჩელსი და რეალი უფრო მომწონდა ვიდრემჟოზეს
0
№42
ავტორი: qamari
31 აგვისტო 2018 16:51
  • სიახლეები: 0
  • კომენტარები: 91
არავის ჭკუას არ ვასწავლი ,მარა ესე შეფასება და სურვილი ,ლამაზი ფეხბურთი ითაშამოს თუ გინდ ვერ მოიგოს ,ჩვენ შეილება ამით დავკმაყოფილდეთ ,მარა აბა იმათ ვკითხოთ ვინც ფულს იხდის ყოველ კვირას და სტადიონზე დადის .ლივერპული ,ტოტენჰემი ,არსენალი გადასარევ ფეხბურთს თამაშობენ და მერე რა? ეხლა იმაზეც არ იკამათებთ რომ ეს სტილი მაურინიოს არ მოუგონია ,ეს დროებამაც მოიტანა ,რასაც თვითონ მანიუს კრიზისი დაერთო .გემოვნებაზე არ დავობენ ,მარა პორტუს და ჩელსის თამაშებს დიდი სიამოვნებით ვუყურებდი და შედეგითაც არ ჩამორჩებოდნენ არავის . ჩელსის და რეალსაც ასამდე გოლი აქვს გატანილი ერთ სეზონში მოუს ხელმძღვანელობით ,ასე რომ ფეხბურთელიც უნდა იყოს პროფი
3
№41
ავტორი: Malboro463
31 აგვისტო 2018 16:42
  • სიახლეები: 0
  • კომენტარები: 4292
ნ1 კანდიდატი ზიდანი უნდა იყოს მარა თუ უარი თქვა მაგის გამო ჟოზეს არ მოხსნაც არ იქნება სწორი ყველა ვარიანტში გასაშვებია ყველაფერთან ერთად ფეხბურთელებთანაც კონფლიქტი აქვს და ეგ დაშლის გუნდს.
ჟოზეს კიდესიმიონეც მირჩევნია ერთიდაიგივემმშემადგენლობით სტაბილურად ათამაშებს გუნდს და მანჩესტერში ვისაც მოითხოვს იმას მიუყვანენ თან სავარაუდოდ სეზონის ბოლოს წავა გუნდიდან. ნაგელსმენიც კაი ვარიNტია და
დროებით არც ჟარდიმია ცუდი.
ლიგაზე კიდე თუ ჩატოვა გუნდი არ გამიკვირდება
0
№40
ავტორი: bziki
31 აგვისტო 2018 15:18
  • სიახლეები: 0
  • კომენტარები: 1102
svani,lev
გასაგებია ყველას გვინდა უფრო შემტევი ფეხბურთი მარა ცუდსა და უარეს შორის ცუდი უნდა ავირჩიოთ ეგეც გასარჩევია რა არის უფრო ცუდი უნაიემერის,ტუხელის ან მსგავსი ტრენერების ყოლა თუ სიმეონე-ალეგრი.
მე პირადათ სიმეონეს ან ალეგრის ძველი ჟოზესს გუნდებიდან სიამოვნებას ვიღებდი და მევასება კიდეც ატლეტიკოც და იუვეც,გამართული დაცვა კარგი სანახავია აქ უბრალოდ ვერ გამართა სისტემა ჟოზემ და დომხალია,თორე დალაგებული დაცვა და სწრაფი კონტრები რასაც ალეგრი უბერავს ან თუნდაც კლოპი კლოპი უფრო აგრესიულ პრესინგს თამაშობს უბრალოდ თორე სტილი ერთია კონტრები,საქმე მაგ სისტემის გამართვაშია იმხელა წნეხი მოდის აქ ტრენერებზე რო მოისს რო ვუყურებდი მეცოდებოდა ვანგაალმაც ვერ გაუძლო იმხელა გამოცდილების მიუხედავათ და ვერც ჟოზემ გაუძლო, და როგორ დავიჯერო ვიღაც ახალგაზრდა შემტევი სტილის ტიპი გაუძლებს ამხელა წნეხს?მითუმეტეს რო დარწმუნებული ვარ უტიტულო სეზონები ექნებათ თავიდან.

საერთოდ ბევრი ბრო აღარ ვწერო თან გასავლელი ვარ.
მე ვემხრობი ჟოზეს გაშვებას თუ ნახეს ვინმე გრძელვადიან პროექტით რო ანდობ კლუბს, თორე ესე გავუშვათ ჟოზე იმის გამო რო დავიღალეთ და იმის იმედზე დავრჩეთ ურემს რო გადავაბრუნებთ გზა გამოჩნდება მაგას როგორ დავუჭირო მხარი?
არადა ვქენით ერთხელ ეგრე გავუშვით მოიესი იმის გამო რო ვიძახდით ამაზე უარესი რაღა უნდა მოხდესო, თან ისე რო კანდიდატიც არ ყავდათ ნაპოვნი და მერე დაიწყეს ფიქრი,რა შედეგამდეც მივედით მაგ ქმედებით კი ვნახეთ.

სანამ უკეთესს არ ნახავ ისე არუნდა ქნა უარესი შეგრჩეს.
2
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.

ავტორიზაცია

მომდევნო მატჩები

25 სექტემბერი 2018, 22:45
იუნაიტედი
დერბი
ლიგის თასი
29 სექტემბერი 2018, 15:30
ვესტ ჰემი
იუნაიტედი
პრემიერ ლიგა
2 ოქტომბერი 2018, 23:00
იუნაიტედი
ვალენსია
ჩემპიონთა ლიგა
დერბი25 სექტემბერი
ვესტ ჰემი29 სექტემბერი
ვალენსია2 ოქტომბერი

წინა მატჩები

22 სექტემბერი 2018, 18:00
იუნაიტედი1
ვულვზი1
პრემიერ ლიგა
19 სექტემბერი 2018, 23:00
იანგ ბოიზი0
იუნაიტედი3
ჩემპიონთა ლიგა
15 სექტემბერი 2018, 20:30
უოტფორდი1
იუნაიტედი2
პრემიერ ლიგა
ვულვზი22 სექტემბერი
იანგ ბოიზი19 სექტემბერი
უოტფორდი15 სექტემბერი

მატჩის საუკეთესო

პოლ პოგბა
6
პოლ პოგბა

პრემიერ ლიგა

ჩამოშლა
ყველა უფლება დაცულია

© MANUTD.GE 2012

Top