პრემიერ ლიგის 32- ე ტური 3 ქულის მომტანი აღმოჩნდა "წითელი ეშმაკებისთვის", რომელთაც "ოლდ ტრაფორდზე" გასავარდნ ზონასთან ახლოს მყოფი "სუონსი' დამაჯერებლად, ანგარიშით 2-0 დაამარცხეს და სატურნირო ცხრილის მეორე ადგილი კიდევ უფრო გაიმყარეს. მატჩის შემდეგ, კომენტარი "წითლების" პორტუგალიელ თავკაცმა ჟოზე მოურინიომ გააკეთა.
"შეხვედრა იდეალური იქნებოდა მაშინ, როდესაც მეორე ტაიმს ჩავატარებდით ისე როგორც ეს პირველი ტაიმის მიმდინარეობა იყო. შეხვედრის პირველ ნახევარში ჩვენ ძალიან კარგად ვითამაშეთ, მოწინააღმდეგე საკუთარ ნახევარს მივაჯაჭვეთ, გავიტანეთ გოლები, ვითამაშეთ ლამაზად, ყველაფერი იდეალურად გაკეთდა. მეორე ტაიმში, ისინი უკეთ ათამაშდნენ.
ჩემი რამოდენიმე ფეხბურთელი, სანაკრებო მივლინებაში იმყოფებოდა, მათ რამოდენიმე მატჩის გამართვა მოუწიათ, ხოლო ეს ყველაფერი დღეს დაღლილობაზე შეეტყოთ, მათ იფიქრეს, რომ შეხვედრა უკვე მოგებული გვქონდა და სწორედ ამიტომ გარკვეული დროის მანძილზე ინიციატივა დათმეს.
თუმცა ყველაფერი კარგად დასრულდა. დარჩენილ შეხვედრებში ჩვენთვის თითოეული ქულა მნიშვნელოვანია რადგან, სატურნირო ცხრილის მეორე ადგილზე გვსურს სეზონის დასრულება.
გასულ წელს ტიტულების მოპოვება შევძელით, მაგრამ პრემიერ ლიგაში მეექვსე პოზიციას დავჯერდით. ამ წელს გვინდა დავასრულოთ მეორე ადგილზე, წელს ავიღეთ ათი ქულით მეტი ვიდრე შარშან, გავიტანეთ მეტი გოლი და გავუშვით საკუთარ კარში ნაკლები. სამწუხაროდ, არსებობს კლუბი, რომლის დაჭერაც ამ ეტაპზე შეუძლებელია. ნებისმიერ სხვა ჩემპიონატში, ჩვენ გვექნებოდა შანსი გვებრძოლა ტიტულისთვის".- განაცხადა დასასრულს მოურინიომ.