პრემიერ ლიგის მე-15 ტურის ცენტრალური შეხვედრა "ოლდ ტრაფორდზე" გაიმართა, სადაც "მანჩესტერ იუნაიტედმა" "ტოტენჰემი" მიიღო და 3-მატჩიანი მოუგებელი სერია დაასრულა. მოურინიო "ოლდ ტრაფორდზე" მეტოქის რანგში დაბრუნდა და "ტოტენჰემის" მთავარი მწვრთნელის პოსტზე პირველი მარცხი განიცადა.
შეხვედრის შემდეგ პორტუგალიელმა კომენტარი გააკეთა: "მათ კარგად დაიწყეს, ჩვენ კი ცუდად. პირველი გოლი მათ გაიტანეს, მეორეს გატანაც შეეძლოთ და უბრალოდ უკეთესად კი არ თამაშობდნენ 30 წუთის განმავლობაში, არამედ მთლიანად დაგვჯაბნეს. ტაიმის ბოლო 15 წუთში კი განსხვავებული სიტუაცია იყო. მეგონა, რომ მეორე ტაიმში ნორმალურ ვითარებას დავუბრუნდებოდით და ნორმალურობა მატჩის კონტროლს ნიშნავს, მაგრამ როცა ასეთ გოლს უშვებ, საქმე რთულდება.
"იუნაიტედმა" უკან დაიხია და ტემპის დაგდება სცადა, ამასთან, ძალიან ჭკვიანურ ჯარიმებს იღებდნენ და დაშავებას თვალთმაქცობდნენ, პარალელურად კი სიტუაციას კარგად აკონტროლებდნენ და კონტრშეტევაზეც სახიფადოდ გვიტევდნენ. მეორე გოლის დროს ჩვენივე შეცდომის გამო დავისაჯეთ. მიზეზი, რის გამოც დარწმუნებით ვიტყვი, რომ "იუნაიტედმა" გამარჯვება დაიმსახურა, არის პირველი 30 წუთი, რომლის განმავლობაშიც უბრალოდ დაგვჯაბნეს".
მოურინიომ პენალტის ეპიზოდი შეაფასა: "არ ვიცი, იყო თუ არა პენალტი, ეპიზოდი არ მინახავს. მაგრამ რაც მოხდა საჯარიმოში, იყო შედეგი მანამდე მომხდარისა. როცა ეშლი იანგმა მიიღო ბურთი, დაუყოვნებლივი რეაგირება უნდა მოგვეხდინა, მაგრამ არ მოგვიხდენია, მარკუსს სივრცეები მივეცით და ბურთი მივაღებინეთ, ჩვენ კი სწორედ ამის შემდეგ გამოვფხიზლდით".