დენი მილსის განცხადებით, "მანჩესტერ იუნაიტედმა" ოლე გუნარ სოლსკიაერის დანიშვნა იჩქარა. სოლსკიაერი ჟოზე მოურინიოს შემდეგ ჯერ დროებითი, შემდეგ კი მუდმივი მწრთვნელის პოზიციაზე დაინიშნა.
"არ მესმის რატომ მისცეს ოლე გუნარს ასე მალე ეს სამსახური. ის მაინც არ დატოვებდა ამ კლუბს. მისთვის სამსახური თუნდაც "ბარსელონას", "რეალ მადრიდს" ან პსჟ-ს შეეთავაზებინა, ყველას მიუტრიალდებოდა და ეტყოდა: "არა, სეზონის ბოლომდე მოვიცდი."
"არ იყო საჭირო მისი ასე სწრაფად დანიშვნა. უცებ მათ სამი მატჩი ზედიზედ წააგეს. ახლა რა ხდება?"
"დიახ, ნამდვილად კარგად დაიწყო ყველაფერი, მაგრამ უეცრად მისი შედეგები არც ისე კარგია. ზაფხულში ამ შედეგებით ბევრ კარგ ფეხბურთელს ვერ მიიზიდავენ."
"რა თქმა უნდა, ისინი მას ვერ დაითხოვენ, ეს არასდროს მოხდება, მაგრამ აირჩიეს კი სწორი პირი ამ სამსახურისთვის?"
დენი მილსმა "ლივერპულისა" და "მანჩესტერ სიტის" ჩემპიონობის შესაძლებლობის შესახებაც ისაუბრა:
"მანჩესტერ იუნაიტედის" გულშემატკივრებისთვის ამაზე ფიქრი და ლაპარაკი რთულია. ისინი, ალბათ, ფიქრობენ: ვინ გვირჩევნია? "სიტი" თუ "ლივერპული"? მე ვიტყოდი, რომ უმეტესობას მაინც "სიტის" ჩემპიონობა ურჩევნიათ. "ლივერპულთან" საშინელი მტრობა აკავშირებთ პრემიერ ლიგის ტიტულების რაოდენობასთან დაკავშირებით."
"ასე რომ გულშემატკივრები შესაძლოა, რომ ამ მატჩს ცოტა სხვა განწყობით შეხვდნენ. ოლე გუნარმა თქვა, რომ მათი გულშემატკივრები მაგიურები არიან და ის მათგან იგივე გულშემატკივრობას ელის, მაგრამ ისინი ცოტათი უფრო შორს იქნებიან."