ჟოზე მოურინიოს მიაჩნია, რომ პრემიერ ლიგის საუკეთესო ოთხეულში მყოფ გუნდებს "მანჩესტერ იუნაიტედის" მდგომარეობისა შეშურდებათ, ვინაიდან "წითლები" ჯერ კიდევ იბრძვიან პრესტიჟული ტიტულის მოსაგებად.
მოურინიოს გუნდს სტოქჰოლმში ევროპა ლიგის ფინალში "აიაქსის" დამარცხებაღა დარჩა ჩემპიონთა ლიგის საგზურის მოსაპოვებლად და სეზონში მეორე ტიტულის მოსაგებად.
კვირას "ტოტენჰემთან" მარცხმა "იუნაიტედს" მათემატიკური შანსიც კი მოუსპო ოთხეულში შესვლისა, რისთვისაც თავის მხრივ "ლივერპული", "მანჩესტერ სიტი" და "არსენალი" ჯერ კიდევ იბრძვიან.
თუმცა, მოურინიოს მიაჩნია, რომ ამ გუნდებს "იუნაიტედის" მდგომარეობაში ყოფნა ურჩევნიათ.
"ჩვენ "მანჩესტერ იუნაიტედი" ვართ და ჩვენთვის ტიტული უფრო მნიშვნელოვანია, ვიდრე საუკეთესო ოთხეულში მოხვედრა.
ასე რომ, თუკი მესამე ტიტულის [ქომუნითი შილდის ჩათვლით], ან როგორც თქვენ გიყვართ თქმა, მეორე ტიტულის მოგებას მოვახერხებთ, საოცარი იქნება, რადგან ეს დიდი მიზანია.
ვიცით, რომ ფინალში დამარცხების შემთხვევაში ჩემპიონთა ლიგაზე ვერ ვითამაშებთ. ეს ვიცით.
მაგრამ ჩვენ ტიტულებისთვის ვიბრძვით და ალბათ სხვა კლუბები, რომლებიც ოთხეულში შევიდნენ, ამჯობინებდნენ ჩვენს პოზიციაში ყოფნას", - განაცხადა მოურინიომ.