ზაფხულის სატრანსფერო ფანჯარაზე "რომა" "მანჩესტერ იუნაიტედის" მცველის, მატეო დარმიანის იტალიაში დაბრუნებას ეცდება.

"ოლდ ტრაფორდზე" გატარებულ სადებიუტო სეზონში დარმიანმა "წითლების" მაისურით 39 მატჩი ჩაატარა, მაგრამ მთავარი მწვრთნელის პოსტზე ჟოზე მოურინიოს მოსვლის შემდეგ სიტუაცია შეიცვალა - მატეო ზოგჯერ სათადარიგოთა სკამზეც კი ვეღარ ხვდება.

შექმნილი ვითარებიდან გამომდინარე არ წყდება ჭორები 27 წლის მცველის კლუბის დატოვების შესახებ. დარმიანს ასევე უკავშირებდნენ "იუვენტუსს", "ინტერსა" და "ჩელსის", რომელსაც ანტონიო კონტე, დარმიანის თანამემამულე და ნაკრებში მისი ყოფილი მწვრთნელი წვრთნის.

თუმცა, თავად ფეხბურთელმა განაცხადა, რომ "იუნაიტედთან" განშორებას არ აპირებს. "მსოფლიოს ერთ-ერთ უდიდეს კლუბში ვთამაშობ, ამიტომ ბედნიერი ვარ. შესაძლო ტრანსფერზე ბევრს ვკითხულობ და ვისმენ, მაგრამ პირადად მე არაფერი ვიცი. ამჟამად ეს ყველაფერი სიცრუეა", - განაცხადა იტალიელმა.

დარმიანს "იუნაიტედთან" მოქმედი კონტრაქტი 2019 წლამდე აკავშირებს. იტალიელი კლუბს 2015 წელს, "ტორინოდან" შეუერთდა. ამ დროის მანძილზე კლუბის მაისურით 57 შეხვედრა ჩაატარა და 1 გოლის გატანა მოახერხა.