ინგლისური მედიის მტკიცებით, "მანჩესტერ იუნაიტედის" ლეგენდამ დევიდ ბექჰემმა "პარის სენ ჟერმენთან" მოლაპარაკებები დაასრულა, სამედიცინო შემოწმება გაიარა და ოფიციალურად, კლუბი მას დღეს გასამართ პრესკონფერენციაზე წარადგენს. დევიდმა ამერიკული "ლა გალაქსი" დეკემბერში თავისუფალი აგენტის სტატუსით დატოვა, მას შემდეგ ინგლისელს არაერთმა კლუბმა გაუკეთა შეთავაზება, მათ შორის პსჟ-მაც, ბექჰემმა კი მხოლოდ დღეს, სატრანსფერო ფანჯრის დახურვამდე რამდენიმე საათით ადრე მიიღო გადაწყვეტილება. მანამდე მან ფორმის შესანარჩუნებლად არსენ ვენგერს სთხოვა დახმარება და დადებითი პასუხის შემდეგ "არსენალში" ივარჯიშა. დევიდს უკვე ნამუშევარი აქვს კარლო ანჩელოტისთან "მილანში" არენდით ყოფნის დროს. ბექჰემი 3 წლიანი შესვენების შემდეგ კვლავ ითამაშებს ჩემპიონთა ლიგაზე, თუ ეს ანჩელოტმა მოისურვა და 1/8 ფინალში "ვალენსიასთან" მისი მოედანზე გაყვანა გადაწყვიტა. პრესკონფერენცია, რომელიც სპეციალურად ამ თემისთვის გაიმართება, (ჩვენი დროით) 8 საათზე დაიწყება.
შეგახსენებთ, რომ დევიდი "მანჩესტერ იუნაიტედის" ღირსებას 10 წლის განმავლობაში იცავდა. მას ბოლო წლებში ჰქონდა შეთავაზებები პრემიერ ლიგიდან, მაგრამ მან არცერთი წინადადება არ მიიღო, ამის მიზეზი კი მხოლოდ ერთი იყო - მას არ სურდა "იუნაიტედის" წინააღმდეგ თამაში. ბევრი ბექჰემსს კარიერის დასრულებას "მანჩესტერში" უწინასწარმეტყველებდა, მაგრამ ეს მხოლოდ მანჩესტერელი გულშემატკივრის სურვილი იყო, რომელიც სამწუხაროდ ალბათ აღარ ასრულდება, რადგან დევიდი უკვე 38 წლისაა და კარიერასაც სავარაუდოთ საფრანგეთში დაასრულებს.

წყარო: skysports.com