ანტონიო კონტემ ჟოზე მოურინიოს ღვაწლი "ჩელსის" ისტორიაში სათანადოდ შეაფასა და იმედი გამოთქვა, რომ პორტუგალიელის წარმატებულ კარიერას გაიმეორებს.

პორტუგალიელმა მწვრთნელმა ბოლო პერიოდში თავისი ყოფილი კლუბის მისამართით გონებრივი თამაშები წამოიწყო და "ჩელსის" სტილს ჯერ მოსაწყენი უწოდა, მერე კი გაუკვირდა, როგორ არ ითხოვენ გულშემატკივრები სათამაშო სტილის შეცვლას.

კონტე მოურინიოს ამ თამაშში არ აჰყვა და პოზიტიურად ისაუბრა ჟოზეს მიერ "ჩელსიზე" მომხდარ ეფექტზე.

როცა ჰკითხეს, ისურვებდა თუ არა, ისეთივე წარმატებული ყოფილი "ჩელსიში", როგორც მოურინიო, იტალიელმა უპასუხა: "იმედი მაქვს, იმედი მაქვს. "ჩელსისთან" ერთად დიდებული ისტორია შექმნა. ძალიან კარგად ვიცი, რომ "ჩელსის" გულშემატკივართა გულებში ჯერ კიდევ უჭირავს თავისი ადგილი. მშვენიერია, ის ამას იმსახურებს.

რა თქმა უნდა, მეც ვიმედოვნებ სამომავლოდ, რომ მის გამარჯვებებს გავიმეორებ. ვფიქრობ, ჟოზე მოურინიომ "ჩელსის" ისტორიაში კარგი ნაწილი დაწერა. ფეხბურთელებთან ერთად ბევრი რამ მოიგო. დიდებული სამუშაო შეასრულა - მნიშვნელოვანია, ყოველთვის, რომ არ დავივიწყოთ.

მას დიდ პატივს ვცემ, რადგან გამარჯვებულია. მომწონს მისი მენტალობა. მას გამარჯვებულის მენტალიტეტი აქვს. რა თქმა უნდა, მსოფლიოში ერთ-ერთი საუკეთესოა და აქ დიდი სამუშაო შეასრულა. ყველა გულშემატკივარმა უნდა სცეს პატივი".

წყარო: goal.com