"მანჩესტერ იუნაიტედის" მთავარი მწვრთნელი ჟოზე მოურინიო "ვესტ ჰემთან" მატჩში გამოვლენილი აგრესიული ქმედების გამო ერთმატჩიანი დისკვალიფიკაციით დასაჯეს.

გასულ კვირას "ოლდ ტრაფორდზე" პრემიერ ლიგის ეგიდით ჩატარებულ მატჩში მოურინიომ აგრესიული ჟესტით გამოხატა მთავარი მსაჯის, ჯონათან მოსისადმი პროტესტი, რომელმაც პოლ პოგბას სიმულაციისთვის ყვითელი ბარათი უჩვენა.

ემოციების ზღვარზე მისულმა მოურინიომ წყლის ბოთლს დაარტყა ფეხი, რის გამოც ტექნიკური ზონიდან გააძევეს. ერთი დღის შემდეგ კი ინგლისის საფეხბურთო ასოციაციამ მას არასათანადო ქმედებაში დასდო ბრალი.

მოურინიოსა და მსაჯების ურთიერთობის ისტორიის გათვალისწინებით, ითვლებოდა, რომ ამჯერად მას რამდენიმე მატჩის განმავლობაში არ დაუშვებდნენ ტექნიკურ ზონასთან, მაგრამ FA-მ მინიმალური სასჯელით შემოფარგვლა არჩია.

მოურინიომ თავისი ბრალეულობა აღიარა და მხოლოდ ერთი მატჩით დაისაჯა, რომელიც გუნდმა უკვე ჩაატარა მის გარეშე.

ლიგის თასის მატჩში, რომელიც "მანჩესტერ იუნაიტედმა" ასევე "ვესტ ჰემის" წინააღმდეგ გამართა და 4:1 მოიგო, პორტუგალიელი მწვრთნელი ტექნიკურ ზონასთან არ იყო.

გარდა ზემოაღნიშნული სასჯელისა, მოურინიომ ასევე 16 ათასი ფუნტი გადაიხადა ჯარიმის სახით.

წყარო: manutd.com