Sky Sports-ი იტყობინება, რომ "მანჩესტერ იუნაიტედში" ჟოზე მოურინიოს მისვლას დეილი ბლინდი და ხუან მატა შეეწირებიან.

მოურინიო, რომელიც ორშაბათს ედ ვუდვორდისა და სერ ბობი ჩარლტონის მასპინძლობით კარინგტონს ეწვია, უკვე ადგენს სატრანსფერო ბაზარზე გასვლის გეგმებს და საჭირო ფეხბურთელებიც აღმოაჩინა.

არც მატა, არც ბლინდი არ იქნებიან მოურინიოს გეგმების ნაწილი მომდევნო სეზონებში. მოურინიო ორივე მათგანს გაყიდის ზაფხულში და მათ ნაცვლად სხვა ფეხბურთელებს შეიძენს.

მატა ერთხელ უკვე გახდა მოურინიოს არასასურველი ფეხბურთელი, როცა "ჩელსის" წლის საუკეთესო მოთამაშემ 2014 წლის იანვარში "იუნაიტედს" მიაშურა.

იმ დროს მოურინიო უკმაყოფილო იყო მატას შრომისუნარიანობით და ასევე ეჭვი ეპარებოდა იმაში, რომ ესპანელი მის ტაქტიკურ სისტემას ერგებოდა. მას შემდეგ კი აზრი არ შეუცვლია და ეს შეიძლება მატასთვის სავალალო აღმოჩნდეს.

გარდა ამისა, ბლინდი, რომელიც ვან გაალმა 14 მლნ. ფუნტად შეიძინა თავის პირველ სეზონში, მოურინიოსთვის არადამაკმაყოფილებელი ფიზიკური მონაცემებით გამოირჩევა, რაც ასევე მის გაყიდვას შეუწყობს ხელს.

ჟოზეს ისტორია იცნობს ისეთი ცენტრალური მცველების შეძენას, როგორებიც კურტ ზუმა და რაფაელ ვარანი არიან, ვინც სისწრაფით, სიმაღლითა და ძლიერი აღნაგობით გამოირჩევიან. სწორედ მათი მონაცემები იყო მნიშვნელოვანი ფაქტორი იმაში, რომ პორტუგალიელმა პირველი მათგანი "ჩელსიში", ხოლო მეორე "რეალში" ათამაშა.

წყარო: skysports