მარკუს რეშფორდი "იუნაიტედის" ყოველი გულშემატკივრის სამიზნე გახდა "მანჩესტერ სიტის" კარში გატანილი გოლის შემდეგ. 18 წლის ბიჭისთვის სიტყვები არც დევიდ ბექჰემს დაუშურებია.

ბექჰემი, ისევე როგორც მარკუს რეშფორდი, კლუბის აკადემიის აღზრდილი ფეხბურთელია და ცნობილი "კლას 92-ის" წევრი. მისი თაობის ფეხბურთელებმა, რაიან გიგზმა, პოლ სქოულზმა, ნიკი ბატმა, გარი ნევილმა და ფილ ნევილმა არაერთი ტიტული მოიპოვეს "იუნაიტედის" რიგებში.

ბექჰემისთვის ყველაზე კარგად არის ცნობილი, თუ რას ნიშნავს "იუნაიტედის" სიყვარული და დერბიში გოლის გატანა. კვირას მოპოვებული გამარჯვების შემდეგ "იუნაიტედის" ყოფილი 7 ნომერი ორშაბათს საღამოს თავის ინსტაგრამ გვერდზე რეშფორდის გოლს გამოეხმაურა:

"როცა ბავშვს უყვარს კლუბი, რომელშიც არის და უყვარს თამაში, რომელსაც თამაშობს, სწორედ ამას იღებ.

მღელვარება, რომელიც მარკუსის სახეზე ჩვენი მტრების კარში გატანილი გოლის შემდეგ გამოისახა, სწორედ ის არის, რაც ბავშვს უნდა ჰქონდეს. ამის დანახვა გაახალგაზრდავებს. ვულოცავ მარკუსს "მანჩესტერ იუნაიტედში" მორიგ დიდებულ დღეს".

წყარო: manutd.com