რამდენიმე გავლენიანი გამოცემის ცნობით, ანხელ დი მარია ძალიან ახლოსაა "მანჩესტერ იუნაიტედში" გადასვლასთან, მას შემდეგ რაც პირადი კონტრაქტი შეათანხმა ინგლისურ კლუბთან.

26 წლის არგენტინელი ლუის ვან გაალის ახალი გუნდის ერთ-ერთი მთავარი ფიგურა იქნება და ის სავარაუდოდ კვირაში 150 000 ფუნტს მიიღებს.

როგორც მოგეხსენებათ, ვან გაალი გუნდს ოფიციალურად სათავეში მას შემდეგ ჩაუდგება, რაც ჰოლანდია გამართავს ბოლო დაპირისპირებას მსოფლიო ჩემპიონატზე ბრაზილიის წინააღმდეგ. მის არყოფნაში კი, სატრანსფერო საქმეებზე სრული პასუხისმგებლობა ედ ვუდვორდს ეკისრება.

არგენტინელის "რეალში" დარჩენის შანსები ძალიან მცირეა, რადგან მადრიდულ კლუბს არ სურს ფეხბურთელის ფინანსური მოთხოვნების დაკმაყოფილება. ამიტომ ერთადერთი გაურკვეველ საკითხად სატრანსფერო თანხა რჩება. როგორც ცნობილია, ესპანური გრანდი მზადაა გუნდის ერთ-ერთ ვარსკვლავს 40 მილიონის სანაცვლოდ გამოემშვიდობოს.

ტრანსფერის წარმატებით განხორციელების შემთხვევაში, ის კლუბისთვის მესამე შენაძენი გახდება ლუკ შოუს და ანდერ ერერას შემდეგ. ეს ტრანსფერი ძალიან სასარგებლო იქნება ვუდვორდისთვისაც, რომელმაც გასული სატრანსფერო ფანჯრის შემდეგ დიდი კრიტიკა დაიმსახურა.

წაყრო: Independent