"მანჩესტერ იუნაიტედი" მწუხარებით იუწყება, რომ ლეგენდარული ცენტრალური მცველი ბილი ფოულკსი 81 წლის ასაკში გარდაიცვალა.
"ბილის წვლილი - 700-მდე მატჩი და კლუბში გატარებული 20 წელი არასოდეს იქნება დავიწყებული. კლუბში ყველა - შტაბი, ფეხბურთელები, გულშემატკივრები ბილის ოჯახის გვერდით ვართ." - განაცხადა ედ ვუდვარდმა.
ფოულკსი კლუბს 1950 წელს შეუერთდა და მისი დებიუტი ორი წლის შემდეგ, "ლივერპულთან" მატჩში შედგა. ბილი გადაურჩა 1958 წლის მიუხენის კატასტროფას, კლუბის მაისურით ჩაატარა 688 შეხვედრა 18 სეზონის განმავლობაში. ამ მხრივ, მხოლოდ სამ მოთამაშეს აქვს მასზე უკეთესი შედეგი - რაიან გიგზს, სერ ბობი ჩარლტონს და პოლ სქოულზს.
საინტერესოა, რომ 1957-58, 1959-60, 1963-64 და 1964-65 წლების სეზონებში ბილი ფოულკსმა ინგლისის ჩემპიონატის უკლებლივ ყველა შეხვედრაში ძირითად შემადგენლობაში იასპარეზა, 1964-65 წლების სეზონში სულაც პირადი რეკორდი დაამყარა: 60 ოფიციალურ შეხვედრაში მიიღო მონაწილეობა! კარიერის დასრულების შემდეგ, 1970-1975 წლებში ბილი ფოულკსი "მანჩესტერ იუნაიტედის" ახალგაზრდულ გუნდებს წვრთნიდა.
უილიამ ენტონი ფოულკსი
კლუბთან ერთად მოგებული ტიტულები
ინგლისის ჩემპიონი - 1956, 1957, 1965, 1967
ინგლისის თასი - 1963
ინგლისის სუპერთასი - 1956, 1957, 1965, 1967
ჩემპიონთა თასი - 1968