რიო ფერდინანდმა ახალი ფორმის პრეზენტაციამდე რამდენიმე დღით ადრე განაცხადა, რომ კლუბის ახალი მაისური ერთ-ერთი ისტორიული ფორმის დიზაინის დეტალებს შეიცავს. "ნაიკიც" აცხადებდა, რომ ახალი დიზაინი "იუნაიტედის" ისტორიის ერთ-ერთ ყველაზე წარმატებულ წლებსაა მიმსგავსებული.
ასეცაა, როგორც აღმოჩნდა, ამ პერიოდში 90-იანი წლები იგულისხმება. ეს ის პერიოდია, როცა "წითლები" მუქ წითელ მაისურს შავი დიდი საყელოთი ატარებდნენ. ფორმა პოპულარული განსაკუთრებით კანტონამ გახადა, ამ რეტრო მაიკას გულშემატკივრები დღესაც კი იძენენ.
თეთრ შორტებს ბოლოში ჰორიზონტალურად შავი ხაზები გასდევს, გეტრები შავი ფერისაა წითელ-თეთრი ხაზებით.
ფორმა, რომელსაც ფეხბურთელები ოფიციალურად მომავალი სეზონიდან გამოიყენებენ, მხოლოდ 150 გრამს იწონის, ეს "ნაიკის" სპეციალური Dri-Fit ტექნოლოგიის დამსახურებაა. ამგვარი ტექნოლოგიით დამზადებული მაისური გრილია და სხეულსაც მშრალად და გრილად ინახავს.
ფორმა გაყიდვაში ხვალიდან, 6 ივლისიდან შემოვა და გულშემატკივარს მისი შეძენა "იუნაიტედის" ოფიციალურ საიტზე 55 ფუნტ-სტერლინგად შეეძლება.
წყარო:
dailymail.co.uk