ინგლისის პრემიერლიგის 32-ე ტურის ცენტრალური მატჩი “ოლდ ტრაფორდზე” შედგა, სადაც “მანჩესტერ იუნაიტედმა” თანაქალაქელი “სიტი” მიიღო. შეხვედრა რობერტო მანჩინის გუნდის გამარჯვებით, ანგარიშით 2:1 დასრულდა.
ანგარიში სტუმრებმა გახსნეს, 51-ე წუთზე “იუნაიტედის” საჯარიმო მოედნის გარედან ჯეიმს მილნერის გასროლილს დავიდ დე ხეამ ვერაფერი მოუხერხა. აღსანიშნავია ისიც, რომ ამ ეპიზოდში რიკოშეტმა ბურთს მიმართულება მცირეოდენ შეუცვალა.ზუსტად რვა წუთში წონასწორობა აღდგა – ფილ ჯონსის თავური დარტყმის შემდეგ ბურთი ვენსან კომპანის ზურგზე მოხვდა და ისე შევიდა “სიტის” კარში. ამრიგად, “ქალაქელთა” კაპიტანს ავტოგოლი ჩაეწერა. მიუხედავად ამისა, სტუმრებმა დაწინაურება კიდევ ერთხელ მოახერხეს, რაშიც ლომის წილი შეცვლაზე შემოსულმა სერხიო აგუერომ დაიდო. 78-ე წუთზე არგენტინელი ფეხბურთელი მეტოქის საჯარიმოში შეიჭრა, რამდენიმე მცველს გვერდი აუარა და ახლო მანძილიდან დარტყმით დე ხეას შანსი არ დაუტოვა – 1:2.

“მანჩესტერ სიტიმ” 65 ქულას მოუყარა თავი, რითაც ლიდერ “იუნაიტედთან” სხვაობა 12 ქულამდე შეამცირა.

მანჩესტერ იუნაიტედი - მანჩესტერ სიტი 1–2

შემადგენლობები:

იუნაიტედი: დე ხეა, ფერდინანდი, ჯონსი, ევრა, რაფაელი, კერიკი, იანგი (კაგავა 90+2), გიგსი, რუნი (ჩიჩარიტო 85), უელბეკი (ვალენსია 80), ვან პერსი.

სიტი: ჰარტი, კომპანი, კლიში, ზაბალეტა, ნასტასიჩი, ბერი, ტურე, ნასრი (აგუერო 71), მილნერი, სილვა (ლესკოტი 90), ტევესი.

გოლები: კომპანი 59' (ა.გ.) – მილნერი 51' აგუერო 78'
გაფრთხილებები:რუნი 32', რაფაელი 90+2', ვალენსია 90+4' – დავიდ სილვა 29', კომპანი 42', ტევესი 85'′, ბერი 90', ზაბალეტა 90+1'.