"მანჩესტერ იუნაიტედმა" პრემიერ ლიგის ახალი სეზონი ფაქტიურად ცენტრალური თავდამსხმელის გარეშე დაიწყო.

კრიშტიანუ რონალდუს ჯერ კიდევ ოპტიმალური სათამაშო ფორმა არ მოუპოვებია, ენტონი მარსიალი კი ჩემპიონატის დაწყებამდე დაშავდა.

კლუბი თავდასხმის წინა ხაზზე სხვა ფეხბურთელის შეძენას გეგმავს. "წითელი ეშმაკები" მარკო არნაუტოვიჩს ადევნებდნენ თვალს, უფრო მეტად მისი დაბალი სატრანსფერო ფასის გამო, მაგრამ კლუბს მოუწია აღნიშნულ შესაძლო ტრანსფერზე ფიქრების დატოვება.

ბრიტანული მედია წერს, რომ "მანჩესტერ იუნაიტედმა" არნაუტოვიჩის შეძენაზე უარი თქვა გულშემატკივრების ზეწოლის გამო. მათ კლუბის აღმასრულებელი დირექტორის, რიჩარდ არნოლდის ელექტრონული ფოსტის მისამართი ფაქტიურად დაბომბეს სიძულვილის შემცველი შეტყობინებებით.

გულშემატკივრებს აქვთ პრეტენზია არნაუტოვიჩის წინააღმდეგ წარსულში მისი რასისტული განცხადებების გამო.

ინგლისური გრანდი ამ ეტაპზე სხვა ვარიანტებზე გადადის. გავრცელდა ინფორმაცია, რომ ინგლისელები ალვარო მორატას კანდიდატურასაც განიხილავენ.