სერ ალექს ფერგიუსონი „ნორვიჩთან“ გასამართი მატჩისწინა პრესკონფერენციაზე რობერტო მანჩინის განცხადებას გამოეხმაურა, სადაც იტალიელი სპეციალისტი „მანჩესტერ იუნაიტედის“ წარმატების მიზეზად იღბალი დაასახელა. რობერტომ წინა კვირაში განაცხადა, რომ „იუნაიტედის“ ბოლო წუთებზე გატანილი გოლებით მოპოვებული გამარჯვებები მხოლოდ და მხოლოდ იღბალის ფაქტორითაა განპირობებული. ფერგიუსონმა მისი ეს სიტყვები შეუფასებლად არ დატოვა და საპასუხო კომენტარში თანაქალაქელ მწვრთნელს განუმარტა, რომ იღბლიანი „მანჩესტერ სიტია“, რადგან ისინი მხოლოდ 12 ქულით ჩამორჩებიან „იუნაიტედს“.
“იღბლიანი თავად მანჩინია, რადგან მისი გუნდი მხოლოდ 12 ქულით ჩამოგვრჩება. „იუნაიტედის“ ბოლო წუთზე გატანილი გოლები იღბალი არ არის. ჩვენ ამას უკვე 25 წელია ვაკეთებთ, ეს საშინელი ჩვევაა.“ - განაცხადა სერ ალექსმა.
გასულ წელს, ფერგიუსონმა ჰარვარდის უნივერსიტეტში სტუმრობისას ჩატარებულ ლექციებზე აღნიშნა, რომ ზოგიერთი კლუბის სავარჯიშო პროცესში, მატჩის მიწურულს გოლის გატანის სწავლებაც შედის.
პრესკონფერენციაზე მან ეს სიტყვები არ გაიმეორა, მაგრამ განმარტა, რომ „იუნაიტედის“ ამ „საშინელი ჩვევას“ შემთხვევითობა არ უნდა ვუწოდოთ. “მატჩის მიწურულს გატანილი გოლები შემთხვევითი არ არის. ტრებლის მოსაპოვებლად, ჩვენ ამას ვაკეთებდით 1999 წელს - თითქმის ყველა ეტაპზე ბოლო წუთებზე გატანილი გოლებით ვიგებდით. ამჯერადაც, ეს შემთხვევითი არ არის, რადგან ამ გუნდს გამარჯვება ყოველ მატჩში სწყურია.“
ფერგიუსონმა „იუნაიტედის“ 1999 წლის და დღევანდელი მდგომარეობა ერთმანეთს შეადარა, სადაც მსგავსება „ქამბექებით“ მოპოვებული გამარჯვებების გარდა, ჩემპიონატების სირთულეში აღმოაჩინა.
“მსგავსებები 1999 წლის სეზონთან არის ის, რომ ინგლისის თასი რთული გამოდგა, ისევე როგორც ჩემპიონთა ლიგა. ჯგუფში ჩვენ „ბარსელონასთან“ და „ბაიერნთან“ ერთად მოვხვდით, 1/4 ფინალში „ინტერს“ შევხვდით, ნახევარფინალში კი „იუვენტუსს“. წელს უკვე „რეალთან“ გვიწევს დაპირისპირება. ინგლისის თასზეც, უმეტეს შემთხვევაში, პრემიერ ლიგის ტოპ კლუბებთან ვთამაშობდით.“ - დაასრულა ფერგიუსონმა.

წყარო: independent.co.uk