"მანჩესტერ იუნაიტედის" მწრთვნელი ოლე გუნარ სოლსკიაერი "ოლდ ტრაფორდისგან" მხარდაჭერას ელის. ნორვეგიელი დარწმუნებულია, რომ გულშემატკივრები პოლ პოგბას გვერდში დაუდგებიან.
"ვულზვთან" გაფუჭებული პენალტის შემდეგ, სოციალურ მედიაში ნახევარმცველი კრიტიკის ქარ-ცეცხლში გაეხვა. იყო მუქარებიც, რომლის გამოც კლუბს აღნიშნულ საქმეში ჩარევა მოუწია. ოლე გუნარი მიიჩნევს, რომ აღნიშნული დაუშვებელია და გულშემატკივრისგან მაქსიმალურ მხარდაჭერას ელის. "ყველამ დაინახა, რომ პოგბა თავად ძალიან იმედგაცრუებული იყო პენალტის გაფუჭების გამო. ის ამას არ იმსახურებს. მე ბევრჯერ ვთქვი და თავად პოლმაც აღნიშნა, რომ როგორც კი "მანჩესტერ იუნაიტედთან" კონტრაქტს აფორმებ შენ "წითელი ეშმაკი" ხდები. ერთხელ "იუნაიტედის" ნაწილად ქცევა გულისხმობს მთელი ცხოვრების "იუნაიტედისთვის" მიძღვნას. პოლი ბევრს მუშაობს და ის ბოლომდე იხარჯება კლუბისთვის ყოველ კვირას."
"ის საკუთარი თავისგან ძალიან ბევრს ელის და მე საერთოდ არ ვარ გაცოფებული გაფუჭებული პენალტის გამო. ჩვენ ბევრს ველით მისგან, მაგრამ მინდა გახსოვდეთ, რომ ერთი ფეხბურთელი ვერ იქნება როი კინი, ვერონი, სქოულზი, გიგზი და კანტონა ერთდროულად. ეს ძალიან რთულია, მაგრამ მინდა გახსოვდეთ, რომ ის უმაღლესი დონის ფეხბურთელია."
"ვიცი, რომ გულშემატკივრები ითხოვენ და ელიან, რომ ის მოედანზე სასწაულებს ჩაიდენს და ყველაფერს გააკეთებს. პოგბა წელს გაცილებით უკეთესია წინა სეზონთან შედარებით, ის გუნდის ლიდერია. ასე რომ დიახ, მე ველოდები, რომ გულშემატკივრები მას გვერდში დაუდგებიან."
"რაც შეეხება ზოგადად ნახევარდაცვის ხაზს, მე სკოტის თამაშით ძალიან კმაყოფილი ვარ. ჩვენ მოედნის მიღმა ჯერ კიდევ გვყავს ისეთი ფეხბურთელები, რომლებსაც თავი არ გამოუჩენიათ. ვგულისხმობ ნემანია მატიჩს, ფრედს, ანდრეას პერეირას. სხვა ფეხბურთელებიც გვყავს, რომლებსაც აუცილებლად იხილავთ მოედანზე, მაგრამ ჯერჯერობით ყველაფერი იდეალურად მიდის."
"ახალგაზრდა ფეხბურთელებსაც აუცილებლად იხილავთ, ამის პირობას გაძლევთ. დაველოდოთ სექტემბრისა და ოქტომბრის შუა კვირის თამაშებს და აუცილებლად დაგანახებთ ჯეიმსსა და ანხელს," - განაცხადა ოლე გუნარმა.