პოსტ-ფერგიუსონის პერიოდში ყველაფერი სხვანაირადაა.
"როცა ფეხბურთელი უფრო მნიშვნელოვანი გახდება, ვიდრე მთავარი მწვრთნელი ან კლუბი, ეს უკვე აღარაა "მანჩესტერ იუნაიტედი"
"მანჩესტერ იუნაიტედის" ისტორიაში იყო ისეთი დიადი პერიოდი, როცა გუნდს მთავარი მწვრთნელის შეხედულებები მართავდა და არა ცალკეული ფეხბურთელის მზარდი მნიშვნელობა. ამ პერიოდის განმავლობაში არაერთი ვარსკვლავი გაუზრდია კლუბს წარმატებისკენ მიმავალ გზაზე და არაერთს განშორებია სწორედ ამ მიზეზით, მაგრამ, როგორც ჩანს, დროება შეიცვალა.
საქმე ის გახლავთ, რომ "იუნაიტედის" ნახევარმველ პოლ პოგბას ახალი გამოწვევები სურს, რასაც მადრიდი "რეალი" სთავაზობს და საეჭვოა, პოგბა ამის წინააღმდეგი იყოს, მაგრამ თანახმა არ არის კლუბის ხელმძღვანელობა.
როცა მსოფლიო ჩემპიონს ვერ აკმაყოფილებ ტიტულებით, კარგი თამაშითა და ვერ აკავებ საკუთარი ავტორიტეტით, საქმეში ფული ერთვება. სწორედ ამ ხერხს მიმართავს "წითელი ეშმაკების" ხელმძღვანელობა, რომელმაც "ოლდ ტრაფორდზე" პოგბას შესანარჩუნებლად უკიდურეს ზომებს მიმართა.
"იუნაიტედს" იმედი აქვს, რომ ფრანგ ფეხბურთელს კვირაში 500 ათასი ფუნტის ოდენობით ხელფასს შესთავაზებს, ის კი კლუბის გამოცვლაზე ფიქრს თავიდან ამოიგებს.
გასულ კვირას პოგბამ საჯაროდ განაცხადა, რომ ახალი გამოწვევა სურს და ამის შესაძლებლობას ესპანეთში სთავაზობენ, თუმცა არც ტურინის "იუვენტუსია" მისი დაბრუნების წინააღმდეგი.
"იუნაიტედის" მთავარ მწვრთნელ ოლე გუნარ სოლსკიაერს კი თავისი გეგმები აქვს და წარმატებისკენ მიმავალ ამ გეგმებს სწორედ პოგბას უკავშირებს. ნორვეგიელი მწვრთნელი მას კაპიტნის სამკლაურს და ახალ გაუმჯობესებულ კონტრაქტს შესთავაზებს, რომლის მიხედვითაც პოლის ხელფასი 290 ათასი ფუნტიდან 500 ათასამდე გაიზრდება, რაც მას ყველაზე მაღალანაზღაურებად ფეხბურთელად აქცევს.
იქნება თუ არა ეს საკმარისი იმისათვის, რომ პოგბამ "იუნაიტედიდან" წასვლა აღარ ისურვოს, დრო გვიჩვენებს, მაგრამ ერთი რამ ცხადია, ჯერ კიდევ კლუბის სიყვარულით ანთებული ალექს ფერგიუსონი ამ მიდგომას არ მოიწონებდა.