ნორვეგიელმა "იუნაიტედის" სამომავლო გეგმებზე ისაუბრა და აღნიშნა, რომ "ოლდ ტრაფორდს" სეზონის დასაწყისამდე ბევრი ფეხბურთელი დატოვებს. "იუნაიტედმა" გუშინდელი ფრეს შემდეგ ოთხეულში მოხვედრის თეორიული შანსიც კი დაკარგა.
ოლე გუნარის მოსვლის შემდეგ გულშემატკივარს მომავალ წელს ჩემპიონთა ლიგაზე თამაშის იმედი გაუჩნდა, თუმცა - უშედეგოდ. "იუნაიტედმა" ვერ შეძლო კარგი სტარტის შენარჩუნება და გუშინ პრემიერ ლიგიდან გავარდნილი გუნდის დამარცხებაც კი ვერ მოახერხა.
რა თქმა უნდა, შედეგებით იმედგაცრუებულია თავად ოლე გუნარიც. მატჩის შემდეგ პრესკონფერენციაში მან აღნიშნა, რომ ფეხბურთელებისგან შრომასა და თავდადებას იღებს და ასევე იყო გუშინდელ მატჩშიც. უბრალოდ, "იუნაიტედი" საკმარისად კარგი ვერ აღმოჩნდა, რომ გამარჯვება მოეპოვებინა.
როდესაც ჟურნალისტებმა ჰკითხეს თუ ვინ გააგრძელებდა თამაშს მომავალ სეზონში "ოლდ ტრაფორდზე" ოლე გუნარმა პასუხი არ გასცა. კონკრეტულად ალექსის სანჩესის შესახებ კი შემდეგნაირი კომენტარი გააკეთა:
"პირველ რიგში ის უნდა ვნახოთ, თუ რამდენად სერიოზული ტრავმა აქვს. მას კოჭი გადაუბრუნდა და დაზიანება მიიღო. რაც შეეხება თქვენს შეკითხვას, ფეხბურთელები ინდივიდუალურად გცემენ პასუხს იმის შესახებ, თუ ვინ დარჩება და ვინ წავა. შეხედეთ მათ მატჩს, სურვილებს, თამაშის ხარისხს და ამაზე პასუხს თავადვე ძალიან მარტივად მიიღებთ."