2018 წლის ზამთრის სატრანსფერო ფანჯრის გახსნისთანავე, "საუთჰემპტონის" ჰოლანდიელი ლეგიონერი ვირჯილ ვან დეიკი გახდა პირველი ფეხბურთელი, რომლის სანაცვლოდაც ისტორიაში პირველად გადაიხადეს კოლოსალური, 75 მილიონი ფუნტი სტერლინგი ცენტრალური მცველის სანაცვლოდ, ვან დეიკმა კი "ლივერპულის" მაისური მოირგო.
შესაძლოა, 2019 წლის ზაფხულის სატრანსფერო ფანჯარა კი აღნიშნული რეკორდის დამხობის დროდ მოგვევლინოს. რეკორდის მოხსნას, ოლე გუნარ სოლსკიაერის "მანჩესტერ იუნაიტედი" გეგმავს, სატრანსფერო სამიზნე კი ბრენდან როჯერსის ინგლისელი უკანახაზელი ჰარი მაგუაიერია, რომელიც "ლესტერის" ღირსებას იცავს.
გასულ წელს, ფეხბურთელის შეძენის მცდელობა ჟოზე მოურინიოსაც ჰქონდა, თუმცა "მელიებმა" შეთავაზებულ 75 მილიონ ფუნტზე უარი განაცხადეს.
ამ მომენტისთვის, ინგლისის ჩემპიონატის ერთგზის გამარჯვებული კლუბი, ინგლისელ უკანახაზელს 90 მილიონ ფუნტ სტერლინგად აფასებს, რომელიც ევროს ეკვივალენტში 105 მილიონს უდრის. სწორედ აღნიშნული თანხის გადახდას გეგმავს გლეიზერების "მანჩესტერ იუნაიტედი" - იუწყება Daily Star Sunday.
აღნიშნული ტრანსფერის შემთხვევაში, ჰარი მაგუაიერი გახდება ისტორიაში პირველი ცენტრალური მცველი რომლის სანაცვლოდაც სტატიაში მითითებულ თანხას გადაიხდიან.