ოლე გუნარ სოლსკიაერი დღევანდელი შედეგით იმედგაცრუებული დარჩა. მისმა გუნდმა პრემიერ ლიგაში პირველი მატჩი წააგო. თუმცა ნორვეგიელის განცხადებით, ფეხბურთელებმა ძალიან კარგი მატჩი აჩვენეს და თამაშის ხარისხით მაინც კმაყოფილია.

დამარცხება არ დაგვიმსახურებია.

"ჩვენ ძალიან ნელა დავიწყეთ, თითქოს ისევ ოთხშაბათ საღამოში ჩავრჩით. ჩვენ ძალიან ბევრი შანსი არ გამოვიყენეთ. მაგრამ ვერ იტყვით, რომ ამ თამაშში წაგება დავიმსახურეთ. ჩვენ ძალიან ბევრი მომენტი შევქმენით. მინიმუმ ხუთი დიდი შანსი გვქონდა, ორჯერ ბურთი ხარიხას გავარტყით."

"დღეს ბევრად უფრო მეტი შანსი შევქმენით, ვიდრე ინგლისის თასზე, მაგრამ მაინც დავმარცხდით. ჩვენ დღეს უკეთესი მატჩი ჩავატარეთ, მაგრამ ეს არაფერს ნიშნავს, თუ სასურველ შედეგს ვერ მიიღებ. როდესაც პირველი გოლი გაგვიტანეს, მაგის შემდეგ მატჩი სხვანაირად წავიდა. თამაშის ხარისხი კარგი იყო, თუმცა შედეგი იმედგამაცრუებელი გახლდათ."

თავის ამატკივებელი შედეგი.

"აქ თავის ატკივებაზე არ არის საქმე. ასეთი რამეები ხდება. უკვე აღვნიშნე, რომ კარებს ორჯერ გავარტყით ბურთი და ოთხი თუ ხუთი იდეალური შანსი გვქონდა. დღეს არც დე ხეას გაუკეთებია რაიმე განსაკუთრებული სეივი. მათ პენალტი დაუდეს, რომლის ნახვითაც დარწმუნებული ვარ, რომ თავად მსაჯიც იმედგაცრუებული იქნება. ტელევიზორში კიდევ ერთხელ ვუყურე და, ჩემი აზრით, ეს პენალტი არ იყო."

არის დე ხეა იმედგაცრუებული?

"ის იმედგაცრუებულია ყოველტვის, როცა გოლს უშვებს, რადგან ის უმაღლესი დონის ფეხბურთელია. ბურთი ძალიან უცნაურად დატრიალდა და მარცხენა მხრიდან მარჯვენა მხრისკენ წავიდა. ძალიან კარგად დარტყმული ბურთი იყო. ეს ერთადერთი დარტყმა იყო, რომელიც მათ პირველ ტაიმში განახორციელეს."

"ჩვენ მას შანსი მივეცით, რომ ბურთი მოერგო და კარგად დაერტყა. ძალიან ნელები ვიყავით. პირველი 15-20 წუთი ძალიან ნელები ვიყავით და სწორედ ამიტომაც მივიღეთ ეს შედეგი. ისინი წნეხის ქვეშ არ მოგვიქცევია და დროც ჰქონდათ გოლის გასატანად."

"არსენალის" პენალტი.

"არ ვფიქრობ, რომ ეს პენალტი იყო. ეს გადაწყვეტილება მსაჯმა მიიღო, მაგრამ დარწმუნებული ვარ, რომ ამ მომენტის განმეორებით ყურების შემდეგ იმედგაცრუებული დარჩება, რადგან ეს პენალტი არ იყო."

ტაქტიკის შეცვლა მატჩის განმავლობაში.

"ჩვენ მთლიანად წინ უნდა გადავსულიყავით, რათა მომენტები შეგვექმნა. მაგრამ ეს ბოლომდე ვერ მოვახერხეთ. ბევრი არაფერი შეგვიცვლია. ეს ის მომენტია, როცა ჩვეულებრივად უნდა შევხვდეთ ამ მომენტს და უბრალოდ მაქსიმალურად კარგად მოვემზადოთ "ვულვზისთვის". ეს დიდებული მატჩია და ამ დღეს მოუთმენლად ველით."

ტრავმები და დატვირთული გრაფიკი.

"ჩვენ ეს საერთოდ არ გვაწუხებს. დღევანდელ მატჩში, უბრალოდ, პირველმა გოლმა გადაწყვიტა ყველაფერი. შემდეგ ჩვენ ცოტათი უფრო მეტად ვფლობდით ბურთს, ვიდრე ისინი. ვფიქრობ, რომ რამდენიმე დიდებული მომენტი შევქმენით. ხანდახან ესეთი რამეები ფორვარდებს ემართებათ. ყველაზე უკეთ მე ვიცი, რომ ბევრი მომენტი შეიძლება ვერ გამოიყენო."

ჩვენ დავბრუნდებით.

"აქამდე ყველაფერი ფანტასტიკურად მიდიოდა, მაგრამ დღეს ყველაზე ცუდი შედეგი მივიღეთ. ქულები დავკარგეთ და ვერც "ტოტენჰემს" დავეწიეთ. ჩვენ მოგვიგია თამაშები, რომელთა მოგებაც არ დაგვიმსახურებია, მაგრამ დღეს წავაგეთ მატჩი, რომლის წაგებაც არ დაგვიმსახურებია. მე ვუყურე, როგორ ვარჯიშობდნენ ეს ბიჭები, თუ რამდენი შრომა ჩადეს ამ მატჩში... იმედი მაქვს, რომ "ვულვზისთვის" მაქსიმალურად მზად ვიქნებით."