ოლე გუნარ სოლსკიაერი გულშემატკივრების გვერდში დგომით გაოცებული დარჩა. მათი ერთგულება ნორვეგიელს უბრალოდ გაოგნებულს ტოვებს. იხილეთ მისი მატჩის შემდგომი ინტერვიუ.

გულშემატკივრები ფანტასტიკურები იყვნენ.
"დღეს ჩვენ ყველამ ძალიან კარგად დავინახეთ "იუნაიტედის" გუნდური შემართება და ერთობა, გულშემატკივრები და ჩვენ, ჩვენ და გულშემატკივრები, ყველანი ერთად ვიყავით. ჩვენ ყოველთვის ვაქებთ მათ, როცა გასვლაზე ვთამაშობთ და ვიმარჯვებთ, მაგრამ უნდა აღვნიშნო, რომ დღეს, უბრალოდ, საოცარი გარემო გვაჩვენეს, ეს დაუჯერებელი იყო. მთელი 90 წუთის განმავლობაში! დღეს გულშემატკივრები მე-12 მოთამაშე გახლდათ."

ჩვენ საუკეთესო შანსები გვქონდა.
"ძალიან ბევრი კარგი მომენტი გვქონდა. არ მახსოვს დავიდს რაიმე სერიოზული სეივი გაეკეთებინოს, ასე რომ ჩვენ გაცილებით უფრო წინ ვიყავით, ერთი თუ ორი დიდებული მომენტი გვქონდა და გატანაც შეგვეძლო. კრისი რომ ფორვარდი ყოფილიყო "ლივერპულის" კარს აუცილებლად დალაშქრავდა. ჯესის შანსი მაინც ყველაზე კარგი და რეალური იყო, მაგრამ ის უბრალოდ ვერ იყო ფორმაში."

ტრავმების შესახებ.
"ჩვენ კარგი შემადგენლობა გვყავს, ძალიან ძლიერი გუნდი. ფეხბურთელები მოდიან და სამუშაოს გაკეთება სურთ. თქვენ ყველას კარგად შეგიძლიათ დაინახოთ გასახდელში დატრიალებული გუნდური შემართება. ჩვენ ვიცით, რომ განსაკუთრებულად კარგად არ გვითამაშია, მაგრამ გუნდურად ძალიან კარგად, ძალიან დიდი შემართებით დავიცავით თავი."

რეშფორდი - ნამდვილი მებრძოლი.
"მარკუსი ნამდვილი მებრძოლია, ის ნამდვილი "მანჩესტერელია" და მთელი სხეულით გრძნობს, თუ რას ნიშნავს ეს თამაში. ჩვენ ის მოედანზე გვჭირდებოდა, რადგან სამი ცვლილება უკვე გაკეთებული იყო. ვფიქრობ, რომ უბრალოდ მათი გეგმა იყო რეშფორდისთვის დარტყმა, რადგან ამას მუდმივად აკეთებდნენ პირველი წუთიდან მოყოლებული. თუ ეს არ არის წესების დარღვევა, მაშინ არ ვიცი რა უნდა გითხრათ. მაგრამ ის დარჩა. კოჭი ძალიან აქვს გასიებული, ბუშტს ჰგავს, მაგრამ ის დარჩა. საოცარი განწყობა გვაჩვენა. ის გაბრაზებულია, თანაც ძალიან გაბრაზებულია, რადგან "ლივერპული" მუდმივად მისთვის დასარტყმელად იყო მომართული და ძალიან ბევრი ჯარიმაც მიიღეს ამის გამო."

მაკტომინეი ფანტასტიკური იყო.
"სკოტმა ბრწყინვალედ ითამაშა. ეს მატჩები მას ადრეც აქვს ჩატარებული, დიდ მატჩებს ვგულისხმობ და მას ძალიან ძლიერი ხასიათი აქვს. ის აკადემიელია, რომელიც ამ მატჩების ყურებაში და შეგრძნებებში გაიზარდან და ვიცოდი, რომ ამ მატჩისთვის სრულიად მზად იყო."

შექება დაცვის ხაზს.
"კრის სმოლინგი და ვიქტორ ლინდელოფი ფანტასტიკური ცენტრალური მცველები არიან და ძალიან კარგად დაიცვეს თავი. ლუკ შოუზე ვეღარაფერს ვიტყვი, თქვენც ძალიან კარგად იცით როგორ ითამაშა მან. აუცილებლად უნდა აღვნიშნო, რომ დაცვის ხაზით მოხიბლული ვარ. ჩვენ ვიცით, რომ ბურთით გაცილებით უკეთ უნდა განვაგრძოთ თამაში. შეგვიძლია კიდეც უკეთესი წარმოდგენების ჩატარება. აუცილებლად უნდა აღვნიშნო, რომ პოლ პოგბა ძალიან, ძალიან კარგი იყო. ყველაფერს, რასაც აკეთებდა გონებით აკეთებდა, ასე რომ მისი კარგი თამაში აუცილებლად აღსანისნავია."

ოთხშაბათს ვბრუნდებით.
"ჩვენ რამდენიმე ფეხბურთელი ტრავმირებული გვყავს, ზოგს ბარძაყის ტრავმა აწუხებს, ზოგს კუნთების, მაგრამ აკადემიელები ძალიან კარგ ფორმაში არიან და ამაზე არ ვღელავთ. ჩვენ ოთხშაბათს საღამოსაც 11 ფეხბურთელი გვეყოლება მოედანზე. კარგია, რომ გამოსაჯანსაღებლად ორი დღე გვაქვს. მაიკლ ქერიკმა შეიძლება მოირგოს ფეხსაცმელი. ისეთ რთულ მდგომარეობაში არ ვართ, რომ მოედანს მე დავჭირდე. ჩვენ კარგად ვართ და მშვენივრად ვგრძნობთ თავს."


წყარო: ManUtd.com