"ოლდჰემ ატლეტიკის" მთავარმა მწვრთნელმა, ლეგენდარულმა პოლ სქოულზმა სადებიუტო მატჩში გამარჯვება მოიპოვა და "იოვილი" უშანსოდ 4-1 დაამარცხა. შეხვედრის დასრულების შემდეგ პოლმა სახალისო განცხადებაც გააკეთა და განაცხადა, რომ მის შედეგებს მოურინიო თვალყურს ადევნებს.
შეგახსენებთ, რომ ჟოზე მოურინიოს "მანჩესტერ იუნაიტედში" ყოფნის დროს, პორტუგალიელი სპეციალისტი ხშირად ეხვეოდა ყოფილი მანჩესტერელის კრიტიკის ქარცეცხლში.
"ვფიქრობ, რომ მოურინიო შედეგებს თვალყურს ადევნებს. მე საკმრისად კრიტიკული ვიყავი მის მიმართ. არ ვფიქრობ, რომ ექსპერტების უმრავლესობისთვის ჩვენი მატჩები ინტერესთა საგანი ხშირად იქნება, თუმცა წაგების შემთხვევაში ისინი აუცილებლად გამოჩნდებიან.
მათ შეუძლიათ თქვან რაც მოესურვებათ. არასდროს მესმოდა თუ რატომ აქცევდნენ ფეხბურთელები და მწვრთნელები კრიტიკოსების კრიტიკას ასეთ ყურადღებას. ისინი უბრალოდ აზიარებენ საკუთარ შეხედულებებს ამათუ იმ თამაშის მიმართ და ამაში ფულს იღებენ.
თუ ვინმეს სურს ჩემს მიმართ კრიტიკული განცხადებების კეთება, გააკეთონ ეს, მე მათ ყურადღებას არ მივაქცევ. პასუხისმგებელი მხოლოდ კლუბის მეპატრონეების წინაშე ვარ". - აცხადებს სქოულზი დასასრულს.