ჟოზე მოურინიომ "ლივერპულთან" გამართულ მატჩზე ისაუბრა. "იუნაიტედი" "ენფილდზე" "პრემიერ ლიგის" მატჩში პირველად დამარცხდა 2013 წლის შემდეგ.
ჩვენ გვჯეროდა, რომ შეგვეძლო გამარჯვება.
"მათ ძლიერი გუნდი ჰყავთ და გვაჩვენეს კიდეც, რომ ყველაზე ძლიერები არიან. რთულია ამ დროს გოლის გატანა. ვფიქრობ, რომ ჩვენთვის რთული პერიოდი პირველი 20 წუთი იყო. ჩვენ უბრალოდ წინააღმდეგობა ვერ გავუწიეთ მათ ფანტასტიკურ ჟინს და სისწრაფეს. ამის შემდეგ, თითქოს, თამაში დავამშვიდეთ და მატჩს ვაკონტროლებდით. აშკარა იყო, რომ ისინი უფრო ხშირად გვიტევდნენ, ვიდრე ჩვენ მათ. ისინი უფრო ხშირად ლაშქრავდნენ ჩვენს ნაწილს, ვიდრე ჩვენ მათსას. იყო მომენტი, როცა მათ უკვე 30 იარდიდან უწევდათ დარტყმა და სწორედ ამ მომენტში ვიგრძენით, რომ გამარჯვება შეგვეძლო. შეიძლება ეს დაუმსახურებელი ყოფილიყო, მაგრამ ხანდახან ფეხბურთში ასეც ხდება. თუმცა სწორედ ამ მომენტში გავუშვით ორი გოლი. დავიდ დე ხეამ შემდგომ აღნიშნა გასახდელში, რომ წესით, ასეთ ბურთებს მარტივად მოიგეირებდა, მაგრამ ორივე რიკოშეტი იყო და სწორედ ამიტომაც ვერ შეძლო ჩვენი გადარჩენა."
იღბალი "ლივერპულის" მხარეს იყო
"თუ იღბალზე გსურთ საუბარი, მაშინ არ გამოტოვოთ მათი მეორე და მესამე გოლები. რაც შეეხება ჩვენს ბურთს, ის ძალიან ლამაზი იყო. მეკარეს ამ შემთხვევაში ვერ დაანაშაულებთ, მე მის ქმედებას მხოლოდ ნახევარ შეცდომას ვუწოდებდი. ამ შემთხვევაში გოლის გატანა უფრო ლუკაკუსა და ლინგარდის კარგი მოძრაობის დამსახურება იყო, ვიდრე მათი მეკარის შეცდომა. და კიდევ ერთხელ ვიმეორებ, იღბალი მათ მხარეს იყო, განსაკუთრებით მეორე და მესამე გოლების დროს."
ოთხეული ჯერ კიდევ მიღწევადია
"ჩვენ ჯერ კიდევ შეგვიძლია ოთხეულში შესვლა. ეს მარტივი არ იქნება, თუმცა ყველაფერს გავაკეთებთ ამისთვის. ის დარწმუნებით შემიძლია გითხრათ, რომ ექვსეულში მოვხვდებით, მაგრამ ამ სიტუაციაში ყველასთვის სანატრელი და საუკეთესო გამოსავალი ოთხეულია. ახლა ჯერ მეხუთე ადგილზე უნდა მოვახდინოთ კონცენტრაცია და მხოლოდ ამის შემდეგ შეგვიძლია ვიფიქროთ ოთხეულზე."
ფეხბურთელები მაქსიმალურად იხარჯებიან
"ფეხბურთელი ვალდებულია, თავისი შესაძლებლობების მაქსიმუმი გააკეთოს ყოველდღიურად, ყოველ მატჩში, ყოველ წუთას, არ აქვს მნიშვნელობა ვინ არის მენეჯერი, შენ ვალდებული ხარ, რომ მაქსიმუმი გააკეთო. შენ, როგორც ფეხბურთელს, კლუბი გიხდის ფულს, გულშემატკივრები გიხდიან ყოველ მატჩზე იქ სიარულით და შენ გვერდში დგომით. ამიტომ ხარ ვალდებული, რომ გააკეთო ყველაფერი. ეს კლუბისა და გულშემატკივრების პატივისცემის საკითხია. დღეს კი ფეხბურთელებმა ყველაფერი გააკეთეს. "ლივერპული" უკეთესი გუნდია. ვერ შევედრებით ვერც სტაბილურობაში, ვერც შეტევაში, ვერც ფიზიკურ მომზადებაში, ვერც ტექნიკაში. ისინი უბრალოდ ჩვენზე უკეთესები არიან. თუმცა ჩვენ თამაშში ბოლომდე ვიყავით ჩართული და მხოლოდ უიღბლობის გამო გაგვივიდა ორი გოლი. მატჩი ფრედ უნდა დამთავრებულიყო."
ტრავმები"მარსიალმა, დალომ, დარმიანმა და ლინდელოფმა მხოლოდ ერთი დღე ივარჯიშეს. მთელი კვირის განმავლობაში არ ვიცოდი ვინ ითამაშებდა. მთელი კვირა კი არა, ბოლო წუთებშიც არ ვიცოდი შეძლებდა თუ არა რამდენიმე მათგანი თამაშს. თუმცა არ ვამბობ, რომ მატჩი ამის გამო წავაგეთ. ეს გამართლება არ არის."
წყარო:
ManUtd.com