ჟოზე მოურინიოს სატრანსფერო სიაში სიახლეებია. პორტუგალიელ სპეციალისტს ახალი სამიზნე ჰყავს. ფრანგული "პარი სენ ჟერმენის" იტალიელი ნახევარმცველი მარკო ვერატი, შესაძლოა გულშემატკივარმა "ოლდ ტრაფორდზე" წითელ მაისურში იხილოს.

დიდი ალბათობით მომავალ სეზონში, "შახტარის" ბრაზილიელი ნახევარმცველი ფრედი კარიერას "მანჩესტერ იუნაიტედში" გააგრძელებს. ვუდვორდი მზად არის უკრაინელებს ფეხბურთელის სანაცვლოდ 52 - მილიონი ევრო გადაუხადოს, ტრანსფერი დასასრულს უახლოვდება და მენეჯერის შემდეგი სამიზნე სწორედ მარკო ვერატი იქნება.

ინგლისური გრანდის ხელმძღვანელობა პარიზელებს ფეხბურთელის სანაცვლოდ მსუყე თანხასაც სთავაზობს. 75 - მილიონი ევრო, ასე გამოიყურება თანხა რიცხვებში, რომელსაც "წითლები" ტუხელის გუნდს შესთავაზებენ.

მარკო პარიზული გრანდის ღირსებას 6 - წელია იცავს, თუმცა ფეხბურთელს კლუბში, ქვეყნის ჩემპიონატისა და სათასო ტურნირების გარდა, დიდი მიზნისთვის ჯერ კიდევ ვერ მიუღწევია. მიზნისთვის რომელსაც ჩემპიონთა ლიგის მოგება ჰქვია.

მოგეხსენებათ, "იუნაიტედს" მაიკლ კერიკის გარდა, რომელმაც საფეხბურთო კარიერა ოფიციალურად დაასრულა, კიდევ ერთი ნახევარმცველი მარუან ფელაინი დატოვებს. ჟოზეს ნახევარმცველები ნამდვილად ესაჭიროება, სწორედ ფრედი და მარკო ვერატი იქნებიან შესაძლო ახალი სახეები, "იუნაიტედის" შემადგენლობაში მომავალ სეზონში.


წყარო: thesun