პოლ პოგბას სურს, რომ ჟოზე მოურინიომ "მანჩესტერ იუნაიტედი" ახალი ფორმაციით ათამაშოს, რათა ფრანმა ფეხბურთელმა ნახევარდაცვის სამეულში მარცხნიდან ასპარეზობისას უფრო მეტი მონაწილეობა მიიღოს შეტევაში.

პოგბას მიაჩნია, რომ მისი შესაძლებლობები დაცვითი ფუნქციების შესრულებისას ლიმიტირებულია. მოურინიო კი პოლის თავდადებითა და მონდომებით უკმაყოფილოა მას შემდეგ, რაც გუნდს ალექსის სანჩესი შეუერთდა.

"ოლდ ტრაფორდის" მკვიდრთა მწვრთნელს პოგბასთვის მას შემდეგ არ მიუცია სრული მატჩის ჩატარების უფლება და ხან ძირითად შემადგენლობაში არ აყენებდა, ხან კი მატჩის დასრულებამდე მოედნიდან გაყავდა.

მოურინიოს პოზიცია კი ასეთია: პოგბას ფიზიკური და ტექნიკური მონაცემების მქონე ფეხბურთელმა ნახევარდაცვაში ნებისმიერი როლი უნდა მოირგოს. მაგრამ პორტუგალიელი სპეციალისტი უკმაყოფილოა მისი დაცვითი მოქმედებით და ბურთის ფლობისას შეტევაში ჩართულობით.

2016 წლის ზაფხულში "იუვენტუსიდან" 105 მლნ. ევროდ შეძენილმა ფეხბურთელმა მიმდინარე სეზონში 15 მატჩი გამოტოვა ტრავმისა თუ დისკვალიფიკაციის გამო. სექტემბერში ჩემპიონთა ლიგაზე მიღებული ტრავმის მიზეზით მას დიდი ხანი უხდებოდა დამოუკიდებლად ვარჯიში.

კვირას კი მოურინიომ "ნიუკასლთან" მატჩში გაშვებული გოლისთანავე გაიყვანა მოედნიდან, რადგან საჯარიმოში ჩაწოდებულ ბურთზე ბრძოლა არ გამართა.

წყარო: dailyrecord