"მანჩესტერ იუნაიტედი" ახლოს არის "აიაქსის" ახალგაზრდა ფეხბურთელის, ჯასტინ კლუივერტის შეძენასთან.

18 წლის ფეხბურთელი, "ბარსელონას" ლეგენდის პატრი კლუივერტის შვილი "აიაქსში" მიმდინარე სეზონში შესანიშნავად ასპარეზობს და მოსალოდნელია, რომ სეზონის ბოლოს მის შეძენას "ოლდ ტრაფორდის" მკვიდრები ეცდებიან.

ეს ტრანსფერი კი ცუდ მდგომარეობაში ჩააყენებდა მარკუს რეშფორდს, რომელსაც მოურინიოს გეგმებში მოხვედრა ბოლო კვირებში საკმაოდ უჭირს.

არ არსებობს ეჭვი, რომ რეშფორდი თავისი ნიჭით თაობის ერთ-ერთ საუკეთესო ფეხბურთელად მოიაზრება.

ინგლისელი ახალგაზრდა სცენაზე ორი წლის წინ გამოჩნდა და მაშინ "მანჩესტერ იუნაიტედის" სადებიუტო შეხვედრაში დუბლი გაიფორმა. ამას კი მოჰყვა ასევე დუბლი პრემიერ ლიგაში "არსენალის" წინააღმდეგ ჩატარებულ სადებიუტო შეხვედრაში, რის შემდეგაც ლუი ვან გაალის გუნდში არაერთხელ გამოიჩინა თავი.

თუმცა, როცა ლუი ვან გაალი პოსტიდან დაითხოვეს და მის ადგილას ჟოზე მოურინიო დანიშნეს, რეშფორდს პირველ სეზონში უკუსვლა არ დაუწყია და გუნდს ინგლისის ლიგის თასისა და ევროპა ლიგის მოგებაში დაეხმარა.

გასულ სეზონში ნაჩვენები წარმატებული თამაშის შემდეგ რეშფორდმა მიმდინარე სეზონი სასტარტო შემადგენლობის რეგულარული წევრის სტატუსით დაიწყო, მაგრამ შემდეგ ენტონი მარსიალთან კონკურენციას ვერ გაუმკლავდა.

გუნდს ზამთარში ალექსის სანჩესის სახით კიდევ ერთი მარცხენა ვინგერი დაემატა და თუკი "იუნაიტედი" ჯასტინ კლუივერტსაც დაიმატებს, ეს რეშფორდის სამომავლო მდგომარეობასთან დაკავშირებით კითხვებს გააჩენს.

მართალია, მარკუსს თავდამსხმელადაც შეუძლია თამაში, მაგრამ აქ მოურინიო რომელუ ლუკაკუს კანდიდატურას ამჯობინებს და სავარაუდოა, რომ მომავალშიც ასე იქნება.

პორტუგალიელს ძალიან მოსწონს ახალგაზრდა ფეხბურთელი და მის გაყიდვას არავითარ შემთხვევაში არ აპირებს, მაგრამ წასვლის სურვილი თავად ფეხბურთელს შეიძლება გაუჩნდეს.

წყარო: express