"მანჩესტერ იუნაიტედის" მთავარმა მწვრთნელმა ჟოზე მოურინიომ ზაფხულის სატრანსფერო გეგმაზე ისაუბრა და მისი აზრით, ჟურნალისტებისთვის არასასიამოვნო ინფორმაცია გაავრცელა.

ზამთრის სატრანსფერო ფანჯარაზე "იუნაიტედი" ალექსის სანჩესით გაძლიერდა, რომელმაც ახალ კლუბში თავისი გოლების ანგარიში უკვე გახსნა.

სანჩესი კი დაემატა შეტევის ხაზში მყოფ ისეთ ფეხბურთელებს, როგორსაც რომელუ ლუკაკუ, ენტონი მარსიალი, ხუან მატა, მარკუს რეშფორდი, ჯესი ლინგარდი და ზლატან იბრაჰიმოვიჩი წარმოადგენენ.

ასეთი შემტევი ხაზის მქონე "იუნაიტედის" მწვრთნელი აღარ აპირებს ამავე პოზიციაზე მოთამაშე ფეხბურთელის დამატებას ზაფხულში და მათ ნაცვლად სხვა პოზიციების გაძლიერებას ეცდება.

"ობიექტურად რომ ვიმსჯელოთ, სიტუაცია ასეთია: ახლა ბევრი ცხრიანი გვყავს. ჩვენთან არიან ალექსისი, ლუკაკუ, მარსიალი, რეშფორდი. რეშფორდს მარცხენა და მარჯვენა ფლანგზე შეუძლია თამაში, როგორც ალექსისს. თითოეულ ზემოჩამოთვლილს კი, გარდა ლუკაკუსი, უკან დახევაც შეუძლიათ, ასევე მეორე თავდამსხმელის როლსაც ითავსებენ.

ასე რომ, ეს ცუდი ამბავია ჟურნალისტებისთვის, რადგან თქვენ მიზეზი გჭირდებათ ისტორიებისა და ჭორების მოსაგონებლად, განსაკუთრებით კი ზაფხულში.

შემტევი ფეხბურთელი აღარ მჭირდება და ამ თემაზე აღარ ვილაპარაკებ, რადგან აქ მეტი აღარავინ მოვა.

ჩვენ გვყავს მატა, ლუკაკუ, რეშფორდი, მარსიალი, ალექსისი. მეტი შემტევი აღარ მჭირდება - სპეკულიაციისთვის სხვა პოზიციები გამოძებნეთ. შემტევებით უკვე კმაყოფილი ვარ.

ჩვენ უნდა გავაუმჯობესოთ არა მოთამაშეთა ხარისხი, არამედ გუნდის დინამიკა და ეფექტურობა მის ქმედებებში, რადგან შაბათსაც კი შეგვეძლო უფრო მეტის გატანა, ვიდრე ორი გოლია", - განაცხადა პორტუგალიელმა.