ცნობილია, რომ ''არსენალის'' ლიდერს ალექსის სანჩესს გუნდთან კონტრაქტი ზაფხულში ეწურება, იგი კონტრაქტის გახანგრძლივებას არ აპირებს და მისი ''არსენალიდან'' წასვლა, ზამთრის სატრანსფერო ფანჯარაზე გადაწყვეტილია. ჩილელი ფეხბურთელის შეძენის მთავარ ფავორიტად ''სიტი'' ითვლებოდა, თუმცა ალექსისით ასევე დაინტერესდა ''იუნაიტედი'' და ''ჩელსი''.
სანჩესის სავარაუდო ტრანსფერზე ცნობილმა ექსპერტმა პოლ მერსონმა კომენტარი გააკეთა. მისი აზრით ''იუნაიტედი'' ტრანსფერში დაწინაურდა, რადგან მათ შეუძლიათ ''არსენალს'' სომეხი ფეხბურთელი მხითარიანი შესთავაზონ. მიმდინარე სეზონში მხითარიანს უჭირს სასტარტოში ადგილის დამკვიდრება, და იგი შეცვლაზეც კი იშვიათად ერთვება თამაშში, ამიტომ მისი წასვლაც სავარაუდოა.
''ჩემი აზრით სანჩესის გაყიდვა ''იუნაიტედში'' და სანაცვლოდ მხითარიანის მიღება, ძალიან კარგი გარიგება იქნება ორივე გუნდისთვის. მე ვფიქრობ, რომ მხითარიანი პრემიერ ლიგის ერთ-ერთი საუკეთესო ფეხბურთელია, უბრალოდ მას ''იუნაიტედში'' არ ენდობიან. თუ ''არსენალი'' მას აათამაშებს ისე, როგორც გერმანიაში თამაშობდა, იგი გახდება გუნდის ახალი ლიდერი და ვარსკვლავი. სავარაუდოდ სანჩესიც და იოზილიც გუნდს ტოვებენ და ''არსენალში'' ვარსკვლავი აღარ რჩება, საინტერესოა ვისი სახელი უნდა ატარონ გულშემატკივრებმა მაისურებზე?. ეს ორივე კლუბისთვის და ასევე სომეხი ვარსკვლავისთვის შესანიშნავი გარიგება იქნება''-განაცხადა პოლ მერსონმა.