მოგეხსენებათ, ჟოზე მოურინიომ "მანჩესტერ იუნაიტედი" 2016 წელს ჩაიბარა. პორტუგალიელმა სპეციალისტმა ხელშეკრულებას 2019-წლამდე მოაწერა ხელი. დღეს გავრცელებული ცნობის თანახმად, "იუნაიტედის" მესვეურებს "განსაკუთრებულთან" კონტრაქტის გახანგრძლივება სურთ.
აღნიშნულ საკითხზე კლუბსა და მწვრთნელს შორის მოლაპარაკებები უკვე დაწყებულია. როგორც The Telegraph-ი იუწყება, საუბარი გრძელვადიან კონტრაქტზე მიმდინარეობს. კონტრაქტის დეტალები ამ ეტაპზე უცნობია.
რაც შეეხება მოურინიოს "იუნაიტედში" მოღვაწეობას, მან კლუბს მისი მცირევადიანი მწვრთნელობის პერიოდში სამი ტიტული უკვე მოაგებინა. მათ შორის ერთ-ერთი ევროპის რანგით მეორე პრესტიჟული ტურნირი, ევროპა ლიგა.
თუმცა, უნდა აღინიშნოს ისიც, რომ პრემიერ ლიგის წლევანდელ გათამაშებაში, "წითლები" მნიშვნელოვნად ჩამორჩებიან საჩემპიონო რბოლაში თანაქალაქელ "სიტის". რაც გარკვეულწილად გულშემატკივრების უკმაყოფილებას იწვევს.