ჟოზე მოურინიოს გეგმებში, დიდი ხანია იტალიელი მარჯვენა მცველი, მატეო დარმიანი არ შედის. რადგან არცერთ მნიშვნელოვან დაპირისპირებაში ფეხბურთელს ძირითად შემადგენლობაში თამაში არ დაუწყია. გრდა ამისა, წითლების მცველი მიზერულ სათამაშო დროს იღებს გუნდის დამრიგებლისგან.
ამ ყველაფერმა წარმოშვა ჭორები იმის შესახებ, რომ შესაძლოა დარმიანმა ზამთრის სატრანსფერო ფანჯრის გახსნისთანავე კლუბი გამოიცვალოს და სათმაშოდ, საკუთარ მშობლიურ ქვეყანას მიაშუროს. კერძოდ, დარმიანის შეძენით იტალიური "ნაპოლი" ინტერესდება.- იუწყება Sky Sports.
28- წლის ფეხბურთელს მიმდინარე ხელშეკრულება "იუნაიტედთან" 2020 წლამდე აკავშირებს. თუმცა, ზემოხსენებული ტელეკანალი ასევე იუწყება, რომ თავად ფეხბურთელიც გამოთქვამს სამშობლოში დაბრუნების სურვილს. ამის ფონზე მოსალოდნელია, რომ კლუბები აღნიშნულ ტრანსფერზე მალე დაიწყებენ მოლაპარაკებების წარმოებას.
შეგახსენებთ, მატეო დარმიანი წითლებს 2015 წელს "ტორინოდან" შეუერთდა, ჯერ კიდევ მაშინ როდესაც "იუნაიტედის" მთავარი მწვრთნელი ლუი ვან გაალი იყო.