"ბარსელონაში" ანტუან გრიზმანის გადასვლის შესახებ გავრცელებული ხმები სულ უფრო და უფრო აქტუალური ხდება.

მედიის უკანასკნელი წარმომადგენელი, რომელიც ამ ინფორმაციას ადასტურებს, ფრანგული გამოცემა Le10 Sport გახლავთ, რომლის მტკიცებითაც, გრიზმანი უთუოდ დატოვებს მადრიდის "ატლეტიკოს" და მისი მომდევნო საშინაო არენა "კამპ ნოუ" იქნება.

ამავე გამოცემის მტკიცებით, "ბარსელონა" კვირების განმავლობაში აწარმოებდა მოლაპარაკებებს ფრანგ ფეხბურთელთან და ბოლოს პრინციპულ შეთანხმებას მიაღწია.

ამის შემდეგ "ბარსელონას" ისღა დარჩება, რომ მხოლოდ "ატლეტიკოსთან" მიაღწიოს შეთანხმებას ტრანსფერის საფასურის თაობაზე.

უკვე აღარ არის ახალი ამბავი, რომ ანტუანს ყოველ წელს უწინასწარმეტყველებენ "ატლეტიკოს" დატოვებას, მაგრამ სად გადავა, ეს კი საკამათო თემად რჩება, ვინაიდან მისი სამსახურით "ბარსას" გარდა "მანჩესტერ იუნაიტედი", "პარი სენ-ჟერმენი" და მადრიდის "რეალი" არიან დაინტერესებულნი სხვა რამდენიმე კლუბთან ერთად.

თავად ფეხბურთელმა კი კიდევ უფრო გაზარდა სპეკულაციები, როცა განაცხადა, რომ სიამოვნებით ითამაშებდა მბაპესა და ნეიმართან ერთად ერთ გუნდში.

ჯერჯერობით უცნობია, პსჟ-ს შესწევს თუ არა გრიზმანში მოთხოვნილი 200 მილიონი ევროს გადახდის უნარი ფინანსური ფეირ პლეიდან გამომდინარე, მაგრამ გრიზმანის შესახებ სიახლეების გაცნობა ზაფხულში ხშირად რომ მოგვიწევს, ეს ფაქტია.