მარუან ფელაინის თვეზე მეტია, რაც არ უთამაშია და შესაძლოა, იგი "ჩელსისთან" მატჩში ვიხილოთ. ლონდონში გუნდს ასევე გაჰყვა მარკოს როხო.

ფელაინი და როხო სტოკპორტის სადგურში შენიშნეს, საიდანაც "მანჩესტერ იუნაიტედი" ლონდონის მიმართულებით გაემგზავრა.

ბელგიელი ჟოზე მოურინიოს გუნდის ერთ-ერთი წამყვანი ფიგურა გახდა მას შემდეგ, რაც პოლ პოგბა "წითლებს" ვერ ეხმარება. სწორედ ფრანგის ტრავმის შემდეგ გააკეთა მოურინიომ არჩევანი ერერასა და ფელაინის შორის ბელგიელის სასარგებლოდ.

მაგრამ მარუანმა სანაკრებო პაუზის დროს ტრავმა მიიღო და მხოლოდ 4-კვირიანი უქმობის შემდეგ დაუბრუნდა გუნდს, ამ პერიოდში კი ნახევარდაცვას ბასკი ფეხბურთელი ამაგრებდა.



რაც შეეხება არგენტინელ მცველს, როხო ჯერ კიდევ გასული სეზონიდან უქმობს უმძიმესი ტრავმის გამო, რომლის მკურნალობასაც რამდენიმე თვე დასჭირდა და ამჟამად მწყობრშია, თუმცა შეუძლია თუ არა სასტარტო შემადგენლობაში მოხვედრა, ეს მწვრთნელის გადასაწყვეტია.



"იუნაიტედის" განაცხადი "ჩელსისთან" მატჩში: დე ხეა, რომერო, პერეირა, ვალენსია, ჯონსი, ბაიი, ლინდელოფი, როხო, სმოლინგი, ბლინდი, იანგი, დარმიანი, ფელაინი, ლინგარდი, ერერა, მაკტომინეი, მატიჩი, მხითარიანი, მატა, მარსიალი, ლუკაკუ, რეშფორდი.