„მანჩესტერ იუნაიტედმა“ „ფულჰემთან“ გამართული შეხვედრა უპრობლემო გამარჯვებით დაასრულა, თუმცა უეინ რუნი მიიჩნევს, რომ შაბათს გასამართი მატჩი უკანასკნელისგან სრულიად განსხვავებული იქნება, რადგან ლონდონელები საკუთარ სტადიონზე შესანიშნავად თამაშობენ. უეინი თვლის, რომ მოწინააღმდეგეს წარმატების მოპოვების სურვილს სატურნირო ცხრილის მდგომარეობაც უმძაფრებს.
„სახლში, „ფულჰემი“ სულ სხვა გუნდია. მათ მოედანზე თამაში ყოველთვის რთულია. მათ პატარა მაგრამ მჭიდრო სტადიონი აქვთ, ეს უხდებათ კიდეც.
ამ გუნდს ჰყავს ფეხბურთელები, რომლებთაც ბურთის გათამაშება კარგად ეხერხებათ. ვფიქრობ, ლონდონში სრულიად სხვა თამაში გველის „ოლდ ტრაფორდზე“ ბოლო გამართული მატჩისგან განსხვავებით.
ისინი ცხრილის მეორე ნაწილში არიან, ამიტომ აუცილებლად ბოლომდე იბრძოლებენ და სამი ქულის მოპოვებას შეეცდებიან. მათ დასამარცხებლად, ჩვენ საკუთარი თავის შესაძლებლობებში დარწმუნება დაგვჭირდება.“ - განაცხადა უეინმა manutd.com-თან საუბრისას.
„საუთჰემპტონთან“ მატჩში სტუმრების მე-3 წუთზე გატანილ ბურთს რუნიმ პირველივე ტაიმში დუბლი მიაყოლა და „იუნაიტედს“ მოაგებინა. ეს უკვე მისი რიგით მეხუთე დუბლია წლევანდელ სეზონში. თუმცა, უეინი გოლების რაოდენობას ყურადღებას არ აქცევს და ყურადღებას მხოლოდ კლუბის გამარჯვებებზე ამახვილებს.
“კარგია, რომ გავიტანე და გუნდს მორიგი სამი ქულის მოპოვებაში დავეხმარე. ამაზე მნიშვნელოვანი გუნდის გამარჯვებაა და არა ჩემი გოლების რაოდენობა. ყოველთვის ვამბობდი, არ მაინტერესებს რამდენს გავიტან, მთავარი კლუბის წარმატებაა.“ - დაასრულა რუნიმ.

წყარო: manutd.com