"მანჩესტერ იუნაიტედის" თავდამსხმელმა რომელუ ლუკაკუმ პრემიერ ლიგის ეგიდით შაბათს "კრისტალ პალასთან" გამართულ მატჩში კოჭი დაიზიანა, თუმცა სერიოზული არაფერია.

გასულ უიქენდზე ლუკაკუმ სრული მატჩი ჩაატარა "ოლდ ტრაფორდზე" და თავისი მე-7 გოლი გაიტანა მიმდინარე სეზონის პრემიერ ლიგაში, რითაც თავის გუნდს 4-0 გამარჯვებაში დაეხმარა.

თუმცა, ბელგიის ნაკრებში გამოძახების შემდეგ მას კოჭის ტკივილები ჰქონდა. ორშაბათს 24 წლის ფეხბურთელს გამოკვლევები ჩაუტარეს, რომლის შედეგებიც ოპტიმისტური გამოდგა.

"რომელუ ლუკაკუმ სრული გამოკვლევა ჩაიტარა, რომელმაც გამოავლინა, რომ მას არც მოტეხილობა აქვს და არც სტრუქტურული დაზიანება", - ნათქვამია ბელგიის საფეხბურთო ფედერაციის ოფიციალურ განცხადებაში.

უსაფრთხოების მიზნით ლუკაკუ უახლოეს დღეებში ინდივიდუალური პროგრამით ივარჯიშებს, მაგრამ 2018 წლის მსოფლიო ჩემპიონატის ეგიდით ბოსნიასა და კვიპროსთან გასამართ მატჩებში მისი მონაწილეობა გამორიცხული არ არის.

აქვე დავამატებთ, რომ ბელგიის ნაკრების მთავარ მწვრთნელ რობერტო მარტინესს ლუკაკუს თამაშით გარისკვის მიზეზი არ აქვს, ვინაიდან ბელგიელებმა მსოფლიო ჩემპიონატზე თამაში უკვე გაინაღდეს.