"მანჩესტერ იუნაიტედის" მთავარმა მწვრთნელმა ჟოზე მოურინიომ დაადასტურა, რომ დავიდ დე ხეა შვეიცარიაში "ბაზელის" წინააღმდეგ გასამართ მატჩს ძირითად შემადგენლობაში დაიწყებს.

გასულ სეზონში "იუნაიტედს" ევროტურნირზე ძირითადად სერხიო რომერო წარადგენდა, თუმცა ამჯერად კარს ესპანელი დაიცავს.

"მე ვაკეთებ იმას, რაც ჩემი აზრით საუკეთესოა გუნდისთვის. არ მიყვარს ეს ცხადი განცალკევება, რომელიც საზღვრავს, თუ ვინ რომელ ტურნირზე ითამაშებს. და მიმაჩნია, რომ ამჟამად დავიდი ძალიან კარგად თამაშობს და თავდაჯერებულია. ხვალაც დავიდს ავირჩევ".

დაცვის ცენტრში კრის სმოლინგი და ვიქტორ ლინდელეფი დადგებიან, რადგან ერიკ ბაიისა და ფილ ჯონსს ევროტურნირზე დისკვალიფიკაცია აქვთ.

"ყველა ერთნაირ დონეზე თამაშობს, ამიტომ პრობლემა არ არის. ჯონსი და ბაიი დისკვალიფიცირებულნი რომ არ იყვნენ, მაინც სმოლინგსა და ლინდელეფს ავირჩევდი. ლინდელეფისთვის, ჩემი აზრით, ამ ტურნირთან შეგუება უფრო ადვილია, რადგან ჩემპიონთა ლიგაზე ადრეც უთამაშია.

პორტუგალიური ფეხბურთი უფრო ახლოსაა ჩემპიონთა ლიგასთან შესადარებლად, ვიდრე პრემიერ ლიგა. მასთან დაკავშირებით გადაწყვეტილი მაქვს, რომ ამ მატჩში ითამაშებს. სმოლინგი კარგად შრომობს, ასე რომ, რატომ არ უნდა გამოვიყენოთ მისი გამოცდილება? მათ ვენდობი. სულაც არ ვღელავ, რომ ჯონსი და ბაიი ვერ ითამაშებენ."