"ლესტერთან" გამართული მატჩის შემდეგ ჟოზე მოურინიო ჟურნალისტებს გაესაუბრა.

კარგი თამაში

"ვფიქრობ, კარგად ვითამაშეთ. 0-0-ზე ყველაფერი შეიძლებოდა მოხდარიყო. "ლურჯი კედელი" კარგად იყო ორგანიზებული და მე ყოველთვის ვაფასებ ასეთ ორგანიზებულ და დისციპლინირებულ თამაშს. ისინი თავს ძალიან კარგად იცავდნენ. გატანილი გოლის შემდეგ კვლავ გავაგრძელეთ კარგად თამაში. სოლიდური - ზუსტად ამ სიტყვით შევაფასებდი ჩვენს დღევანდელ თამაშს. ყველა მოტივირებულია, ისინიც კი ვინც სათადარიგოზეა."

შეცვლების ეფექტი

"მოხარული ვარ მათით. ყველა გულმოდგინედ მუშაობს იმისთვის, რომ გუნდს საჭირო სიტუაციაში დაეხმაროს. ისინი სათადარიგოთა სკამზე არიან, მაგრამ შემდეგ შემოდიან და გუნდის დასახმარებლად ყველაფერს აკეთებენ, ეს დასაფასებელია. ანდერი სათადარიგოთა სკამზე იყო, მაგრამ იქიდან ხელმძღვანელობდა ფეხბურთელებს, უყვიროდა, ეხმარებოდა მათ. აი ასეთი გარემოა ჩვენთან."

მოთმინება შედეგს იძლევა

"გასულ სეზონში შეიძლება ყველაფერი სხვაგვარად მომხდარიყო და ამის მაგალითიც გვაქვს, როდესაც "ბორნმუთთან" პენალტი ვერ გამოვიყენეთ ამან ჩვენს ფსიქოლოგიაზე იმოქმედა და ვერ მოვახერხეთ გამარჯვების გოლის გატანა. დღეს ჩვენ პენალტი კვლავ ვერ გამოვიყენეთ, მაგრამ გუნდმა თამაში ჩვეულ სტილში განაგრძო და ამან შედეგი გამოიღო. მარკუსი მატას ნაცვლად იმიტომ გამოვიყვანე, რომ ის ხუანისგან სრულიად განსხვავებული ფეხბურთელია და უფრო მეტ დინამიკას შეგვძენდა, ხოლო მხითარიანს ყვითელი ბარათი ჰქონდა და მარუანი სწორედ მის ნაცვლად გამოვიყვანე, თან ის საჰაერო ორთაბრძოლებში შეძლებდა დახმარებას. მე მაქვს ოფციები, ფეხბურთელები მაძლევენ იმას რასაც მე მათ ვავალებ, ასე რომ სეზონის პირველი თვით კმაყოფილი ვარ."

ხარისხი იძლევა სხვაობას

"განსხვავება არის იმ ფეხბურთში, რომელსაც ჩვენ ვთამაშობთ. გუნდი კარგად თამაშობს, თავდაჯერებულია, თავდაჯერებული ვარ მეც. ჩვენ კარგად ვგრძნობთ თავს ბურთთან და კარგი ვართ კონტრ-შეტევებზე, მაგრამ ახალი არაფერია, ჩვენ ცხრა შესაძლო ქულიდან ცხრა ქულა გვაქვს, ყველაფერი ისეა როგორც გასულ სეზონში. ჩვენი მთავარი ამოცანაა შევინარჩუნოთ და ვითამაშოთ ის ფეხბურთი, რომელიც გასულ მატჩებში ვაჩვენეთ."

ზლატანის დაბრუნება

"ზლატანი იანვარში დაბრუნდება. როდესაც სატრანსფერო ფანჯარა გაიხსნება და გუნდებს ამა თუ იმ ფეხბურთელზე ფულის დახარჯვა მოუწევს ჩვენ ეს პრობლემა აღარ გვექნება. ჩვენ გვეყოლება ფეხბურთელი, რომელმაც გასულ სეზონში ჩვენს გუნდში მთავარი როლი ითამაშა. ის ჩვენ სეზონის მეორე ნახევარში დამატებით შესაძლებლობებს მოგვცემს."

სეზონის შესანიშნავი დასაწყისი

"უკეთეს დასაწყისზე ვერც ვიოცნებებდით, მაგრამ კიდევ ერთხელ უნდა აღვნიშნოთ, რომ ეს არაფერს ნიშნავს, რადგან გასულ სეზონშიც სამ თამაშში ქულათა მაქსიმუმი მოვაგროვეთ. განსხვავება ის გახლავთ, რომ გასულ სეზონში ჩვენ ამ დროს სხვა ფეხბურთს ვაჩვენებდით, ახლა კი განსხვავებულ ფეხბურთს ვთამაშობთ და ასე უნდა გავაგრძელოთ."

წყარო:MANUTD.COM