მადრიდის "რეალის" ვარსკვლავ, ხამეს როდრიგესი "მანჩესტერ იუნაიტედს" ტრანსფერზე შეუთანხმდა და მომდევნო სეზონიდან "ოლდ ტრაფორდზე" იასპარეზებს.

ესპანური მედია გამოცემა RCN Radio აცხადებს, რომ შემტევი "წითლების" რიგებში იმ შემთხვევაში გადავა, თუკი უეინ რუნი კლუბს დატოვებს.

მიმდინარე სეზონში გუნდის კაპიტანი პერიფერიული ფიგურა გახლავთ. მან მხოლოდ 7 გოლი გაიტანა მთელ სეზონში და ძირითადად სათადარიგოთა სკამიდან ერთვებოდა მატჩში.

თავის მხრივ მედია უეინის შესახებ იტყობინება, რომ 31 წლის ფეხბურთელს ჩინეთიდან მეგაშეთავაზებები აქვს.

როდრიგესს კი "რეალში" რუნის მსგავსი მდგომარეობა აქვს სათამაშო პრაქტიკის მხრივ, რამეთუ ზინედინ ზიდანი მას არც ისე სწყალობს და იშვიათად აძლევს თამაშის საშუალებას.

აქვე უნდა აღინიშნოს ისიც, რომ 25 წლის ფეხბურთელი აგენტი ჟორჟე მენდეშია, რომელიც ასევე მოურინიოს ინტერესებს იცავს და კლუბში გავლენიანი პიროვნებაა.

თუმცა, როგორც ხშირად ხდება ხოლმე, "რეალის" ფეხბურთელის ბედს ფლორენტინო პერესი გადაწყვეტს.

აღსანიშნავია ის ფაქტიც, რომ გავრცელებულ ინფორმაციას შეთანხმების მიღწევის თაობაზე ბი-ბი-სიც ადასტურებს.