ჟოზე მოურინიომ ორიგინალურად გამოუხატა მხარდაჭერა კლაუდიო რანიერის, რომელიც "ლესტერ სიტის" მთავარი მწვრთნელის პოსტიდან პრემიერ ლიგაში ჩემპიონობის მოპოვებიდან რამდენიმე თვეში დაითხოვეს.

"მანჩესტერ იუნაიტედის" მთავარი მწვრთნელი დღეს გამართულ პრესკონფერენციაზე "ადიდასის" მაისურით მივიდა, რომელზეც კლაუდიო რანიერის ინიციალები იყო ამოკვეთილი. ამ გზით მან კიდევ ერთხელ გამოუხატა მხარდაჭერა იტალიელს, რომელსაც მანამდე სოციალური ქსელის გამოყენებით მიმართა.

რანიერის გაძევებას ფეხბურთში ერთ-ერთი ყველაზე ნეგატიური რეაქცია მოჰყვა, რამეთუ მის შემოქმედებას უდიდეს საფეხბურთო შოკს უკავშირებენ, რომელიც 2015/16 წლების სეზონის ჩემპიონობაში გამოიხატება.

მოურინიომ მსგავსი რამ 2015 წელს გამოსცადა, როცა "ჩელსის" მთავარი მწვრთნელის პოსტიდან ჩემპიონის სტატუსის დაცვის პროცესში დაითხოვეს, თუმცა არ ფიქრობს, რომ მისი და რანიერის გამოცდილება ერთმანეთთან შედარების ღირსია: "ჩემ მაგივრად ჩემი მაისური მეტყველებს, რამეთუ მისი სახელია ჩემი პატარა მიძღვნა ადამიანისადმი, რომელმაც პრემიერ ლიგის ყველაზე ლამაზი ისტორია დაწერა. ადამიანი, რომელმაც დაიმსახურა, რომ "ლესტერის" სტადიონს "კლაუდიო რანიერი" უწოდონო, გაძევებულია.

ამიტომაც ვფიქრობ, რომ "ლესტერი" ზედიზედ ორი წლის განმავლობაში წერდა ისტორიას. პირველ წელს იმიტომ, რომ პრემიერ ლიგაში ყველაზე ლამაზი, მსოფლიო ფეხბურთში ერთ-ერთი ყველაზე ლამაზი რამ გააკეთეს და ახლა იმიტომ, რომ საგაზეთო სათაურები დაიპყრეს გადაწყვეტილებით, რომელიც, ჩემი აზრით, ფეხბურთთან დაკავშირებულ ყველა ადამიანს შეეხო, რადგან ამასთან შეგუება ძალიან რთულია. თუმცა, ამავდროულად ადვილად გახვედრებს, როგორია თანამედროვე ფეხბურთი, ამას უნდა მივეჩვიოთ. შარშან, როცა ჩემპიონის რანგში გამაძევეს, ვფიქრობდი, რომ გიგანტურად ნეგატიური რამ მოხდა. ახლა კი ვხვდები, რომ ეს არაფერია იმასთან შედარებით, რაც კლაუდიოს თავს გადახდა.

ჩემი ინსტაგრამ-პოსტი მცირე მიძღვნა იყო, ჩემი მაისური მორიგია და ვფიქრობ, აღარ სჭირდება მეტი რამის მიძღვნა, რადგან ვერავინ წაშლის მის მიღწევას და ის ამბები, რასაც ვკითხულობ, მართალი თუა ან ოდნავი სიმართლე მაინც არის მათში, მაშინ რთულია იპოვო სიტყვები, რომლებიც დააკმაყოფილებენ მდგომარეობას. თუმცა, მწვრთნელები ამასთან გასამკლავებლადაც მზად უნდა ვიყოთ."

როცა ჰკითხეს, "ლესტერის" ფეხბურთელები არიან თუ არა დამნაშავენი, მოურინიომ განაგრძო: "კლაუდიოს ბრალია, რადგან შარშან ჩემპიონობის ნაცვლად მე-12 ადგილზე რომ გასულიყო, ახლა კვლავ იქნებოდა თავის თანამდებობაზე, რადგან "ლესტერ სიტი" კვლავ გადარჩენისთვის იბრძვის. ამიტომ მისი ბრალია, ის თავად იმკის წარმატების შედეგებს.

თავისი წარმატების საზღაურია და ალბათ, სეზონიც სხვების ეგოისტობით დაიწყო, ხალხი ახალ კონტრაქტებზე ფიქრობდა, წასვლაზე ფიქრობდა, უფრო მეტი ფული სურდათ, აღარ ახსოვთ, ვინ მიაღწევინა ამ დონეს. მაგრამ ეს მხოლოდ ფეხბურთს არ ეხება, ჩვენი სამყაროს მახასიათებელია. შესაძლოა, თქვენი სამყაროსიც, იცით. ზოგიერთი პრინციპი ქრება, ამიტომ მართლა ვწუხვარ ამის გამო, მაგრამ მეც გამოვიარე მსგავსი გამოცდილება, რომელიც, ვიმეორებ, არაფერია კლაუდიოს ვითარებასთან შედარებით. თუმცა, არსებობს რაღაც, რასაც ვერავინ იზამს, ის არის ლიდერი, ის არის ისტორია, ამიტომ არ იდარდო, კლაუდიო, ამას ვერავინ წაგართმევს."