"მანჩესტერ იუნაიტედის" მთავარმა მწვრთნელმა, ჟოზე მოურინიომ ევროპა ლიგის 1/8 ფინალში "როსტოვთან" დაპირისპირებას ყველა ასპექტში ცუდი უწოდა.

"წითელმა ეშმაკებმა" რამდენიმე საათის წინ გაარკვიეს თავისი მომდევნო ევროპელი მეტოქის ვინაობა და კენჭისყრის შედეგად გადაწყდა, რომ 9 მარტს "იუნაიტედს" რუსეთში მოუწევს გამგზავრება, რათა "როსტოვთან" პირველი მატჩი გამართოს. 4 დღის შემდეგ კი მოურინიოს შეგირდები ინგლისის თასის ნახევარფინალში "ჩელსის" დაუპირისპირდებიან, რის გამოც მოურინიო იმედს გამოთქვამდა, რომ ახლო მანძილზე მყოფ გუნდთან მოუხდებოდა თამაში, მაგრამ მისი მოლოდინი არ გამართლდა.

"საუთჰემპტონთან" მატჩის წინა პრესკონფერენციაზე მოურინიომ განაცხადა: "ყველა ასპექტში ცუდი კენჭისყრაა. შორია და რთულია. ჩვენთვის ცუდ პერიოდში დაემთხვა. რთული კი იმიტომ არის, რომ ძალიან კარგი გუნდი ჰყავთ, ჩემპიონთა ლიგაზე კარგად ასპარეზობდნენ.

პლეი-ოფში "აიაქსი" და "ანდერლეხტი" დაამარცხეს, ჯგუფურ ეტაპზე კი ნამდვილად რთული მეტოქეები ჰყავდათ "ბაიერნისა" და "ატლეტიკოს" სახით, რომელთა წინააღმდეგაც მნიშვნელოვან შედეგს მიაღწიეს. "ბაიერნი" დაამარცხეს და "ატლეტიკოს" ფრე ეთამაშეს, პსვ ჩამოიტოვეს და მესამე ადგილზე გავიდნენ.

მათ მწვრთნელს კარგად ვიცნობ, მის წინააღმდეგ მაშინ ვითამაშე, როცა ყაზანის "რუბინში" მუშაობდა, მე კი იტალიაში "ინტერს" ვწვრთნიდი. ეს გუნდი მართლაც რთულად დასამარცხებელი, ძალიან დაცვითი და ფიზიკურად ძლიერია, ასე რომ, ცუდი კენჭისყრაა, მაგრამ "საუთჰემპტონისა" და "ბორნმუთის" შემდეგ ამაზე მოვახდენთ კონცენტრაციას და მივხედავთ."

წყარო: manutd.com