"მანჩესტერ იუნაიტედის" მეკარე სერხიო რომერო აცხადებს, რომ თავისი შესაძლებლობების დამტკიცებისთვის ყველაფერს გააკეთებს და პირველ გუნდში თამაშის შანსს ორი ხელით ჩაებღაუჭება.

არგენტინელმა საკმაოდ დამაჯერებლად ითამაშა ყველა შეხვედრა, სადაც კი მონაწილეობა მიიღო და 2016/17 წლების სეზონში ჩატარებულ 9 მატჩში მხოლოდ ორი გოლი გაუშვა.

რომერო გუშინ 30 წლის გახდა და საჩუქრად მოურინიოსგან მორიგი შანსი მიიღო, რაც კვლავ "მშრალი" მატჩის ჩატარებით აღნიშნა "სენტ-ეტიენთან".

"თავს მშვენივრად ვგრძნობ და ბედნიერი ვარ, რომ ვთამაშობ. ყოველთვის მნიშვნელოვანია გუნდის დახმარების შანსის მიღება. სათამაშო დრო მეც მჭირდება, რათა ჩემი ქვეყნის ეროვნულ ნაკრებში ადგილი არ დავკარგო და ეს მატჩები მენტალურადაც მეხმარება, რამეთუ მიჩვენებენ, რომ საკმარისად კარგ დონეზე ვთამაშობ ამ ჩემპიონატში ყოფნისათვის.

ყოველთვის პოზიტიურად ვუდგები საკითხებს. მართლაც ბევრს ვშრომობ იმისათვის, რომ მზად ვიყო მიღებული შანსისათვის. როგორც კი შანსს ვიღებ, მას უქმად არ ვფლანგავ. მინდა, ყველას ვაჩვენო, რომ მზად ვარ, თამაში მსურს და საკმარისად კარგი ვარ სათამაშოდ.

საკუთარი თავისადმი დამტკიცებაც თამაშობს როლს - ჩემი უმთავრესი მიზანი ალბათ ეს არის. თითოეულ ვარჯიშს ისე ვიწყებ, რომ ვფიქრობ, კვირის ბოლოს მოედანზე გავალ. თუ სათადარიგოთა სკამზე ვხვდები, იმედგაცრუებული ვარ. მაგრამ როცა ჩემს შანსს ვიღებ, ჩემს თავს და ჩემს ოჯახს ვუმტკიცებ, რომ ამ საქმისთვის ვვარგივარ.

ჩემი ცოლი ყოველთვის მიჭერს მხარს, ჩემი ორი ქალიშვილი კი ხშირად მეკითხება, როდის ვითამაშებ, ამიტომაც მინდა ვაჩვენო მათ, რომ ამის გაკეთება ძალმიძს. მერე მთელ ამ სამუშაოს კვირის განმავლობაში მეკარეთა მწვრთნელთან ასრულებ და მწვრთნელი თავდაჯერებულობას გაძლევს, როცა შენ გირჩევს, ამიტომ მოედანზე უნდა გახვიდე და კარგად იასპარეზო.

სასიამოვნო იყო, რომ ოთხშაბათს ვითამაშე. ყოველთვის მზად ვარ ამისთვის და 100 პროცენტით დავიხარჯე მატჩისთვის, რომელიც ჩემს დაბადების დღეს დაემთხვა. ჩემი ცოლისა და შვილებისგან შორს ვიყავი, მაგრამ ბედნიერი ვარ, რომ ვითამაშე", - განაცხადა რომერომ.

წყარო: manutd.com