ზლატან იბრაჰომოვიჩი მოხარულია, რომ "მანჩესტერ იუნაიტედში" თავისი პირველი ჰეთ-ტრიკი შეასრულა და მიაჩნია, რომ ეს გოლები სეზონის "გადამწყვეტ მომენტში" მოვიდა.

შვედმა "ოლდ ტრაფორდზე" გამართულ ევროპა ლიგის შეხვედრაში სამჯერ გამოიჩინა თავი და თავისი გოლების რაოდენობა მიმდინარე სეზონში 23-ს გაუტოლა, რითაც თავის გუნდს საფრანგეთში ჩასატარებელი მატჩის წინ საგრძნობი უპირატესობა მოუპოვა.

"იუნაიტედის" ოფიციალური ტელევიზიისა და "ბი-თი სპორტისთვის" ინტერვიუს მიცემისას შვედმა მადლობა გადაუხადა თანაგუნდელებს, რომლებიც სამი გოლის გატანაში დაეხმარნენ.

"კარგი გრძნობაა. ყველაზე მნიშვნელოვანი ის არის, რომ საპასუხო მატჩს კარგი შედეგით ვხვდებით. კარგად ვითამაშეთ, მეტიც შეგვეძლო, მაგრამ შანსები შევქმენით და სამი გოლი გავიტანე, რაც ასევე მნიშვნელოვანია, ამიტომ მადლობა ჩემს თანაგუნდელებს.

ყოველთვის, როცა "სენტ-ეტიენს" ვეთამაშები, იღბლის ხარჯზე თუ თამაშის ხარჯზე, რამდენიმე გოლი მაინც გამაქვს! ამაზე სულაც არა ვარ ფოკუსირებული; დღეს გავიტანე და იმედი მაქვს, მომდევნო კვირაშიც გავიტან. ევროპა ლიგაზე შორს წასვლა გვინდა.

ვიმარჯვებთ, მაგრამ მოკლე დროში შეიძლება ყველაფერი შეიცვალოს. მნიშვნელოვანია მუხტის შენარჩუნება, შრომა, საჭირო გამარჯვებების მოპოვება და თავდაჯერებულობის შენარჩუნება. ყველაფერი სწრაფად იცვლება, მაგრამ ამჟამად ბედნიერები ვართ და ბევრს ვშრომობთ. სეზონის გადამწყვეტი მომენტია, სეზონის მეორე ნახევარი წყვეტს, რა მოხდება", - განაცხადა იბრაჰიმოვიჩმა.

გასაკვირი სულაც არ არის, რომ იბრაჰიმოვიჩი მატჩის საუკეთესო ფეხბურთელად დაასახელეს გამოკითხულთა ხმების 66%-ის მიღების შედეგად, რითაც ორ სხვა ნომინანტს, პოლ პოგბას (27%) და ერიკ ბაიის (7%) აჯობა.

სანამ ინდივიდუალურ ჯილდოებს აგროვებს, შვედი ტიტულების მოგების მნიშვნელობას არ ივიწყებს, თუმცა არც ილუზიებს იქმნის.

"ეს არის მიზანი. პრემიერ ლიგის პირველი ოთხი გუნდი ჩემპიონთა ლიგაზე გავა და ერთ-ერთი მათგანი ჩემპიონი გახდება. დანარჩენები, ალბათ, ტიტულს ვერ მოიგებენ. ჯერ კიდევ ოთხ ტურნირზე ვთამაშობთ, მეხუთე კი მოვიგეთ, ქომუნითი შილდი, ასე რომ, პრემიერ ლიგას თუ ვერ მოვიგებთ, სხვა ტიტულების მოგება შეგვიძლია, რაც ასევე კარგია.

კარგი შედეგი მივიღეთ, რადგან ვიცი, რამდენად რთულია იქ თამაში. ფანტასტიკური გულშემატკივრები, ფანტასტიკური მხარდაჭერა აქვთ და ძალიან კარგი სტადიონიც, ბიჭები ნახავენ, როცა ჩავალთ.

კარგი გუნდი ჰყავთ, ყველა გუნდს ურთულებენ ცხოვრებას, ვისაც ეთამაშებიან. როცა "პარი სენ-ჟერმენში" ვთამაშობდი, ზუსტად ასე იყო - დღესაც კარგები იყვნენ. როგორც ვიცი, მათ რამდენიმე ახალი ფეხბურთელი ჰყავთ, ზოგიერთმა გუნდი დატოვა, მაგრამ კარგი ჰყავთ."

წყარო: manutd.com