"ჩელსის" ყოფილი მცველი აღნიშნავს, რომ ჟოზე მოურინიოს მიმართ ნეიტრალური დამოკიდებულების ქონა შეუძლებელია და პორტუგალიელს მსოფლიოს ერთ-ერთ საუკეთესო მწვრთნელად მოიაზრებს.

სერბმა მცველმა "ჩელსიში" გატარებული 9 წლის შემდეგ სანქტ-პეტერბურგის "ზენიტს" მიაშურა, "სტემფორდ ბრიჯზე" გატარებული დროის უმეტეს ნაწილში კი მან ჟოზე მოურინიოს ხელმძღვანელობით იასპარეზა, რომელიც ლონდონელებმა გასულ დეკემბერს დაითხოვეს.

ივანოვიჩის თქმით, მოურინიო ფეხბურთელებში განსაკუთრებულ თავდაჯერებულობას აღვიძებს, როცა ისინი მის იმედებს ამართლებენ.

"ხალხი "განსაკუთრებულს" ეძახის და ვფიქრობ, არის კიდეც. თუ იმარჯვებ, მის ნდობას საზღვარი არ აქვს. ისეთ პოტენციალს გამოავლენ, რომლის შესახებ თავადაც კი არაფერი იცოდი.

მოურინიოს ვარჯიშები უნიკალური იყო. ხანდახან პრესასთან გონებრივ თამაშს თამაშობს, მაგრამ როცა საქმე მატჩებს ეხება, ძალიან სერიოზულია. მოურინიოს გუნდში თამაში თუ გსურს, მის მოთხოვნილებებს უნდა აკმაყოფილებდე.

მოურინიო საუკეთესო უნარების განვითარებაში გეხმარება - პროფესიონალურის და პირადულის. მის მიმართ ნეიტრალური დამოკიდებულება ვერ გექნება, ის ან გიყვარს, ან გძულს. სწორედ ეს ხდის განსაკუთრებულს. მოხარული ვარ, რომ მასთან ერთად მუშაობის შანსი მომეცა", - განაცხადა "ჩელსის" ყოფილმა მცველმა.

წყარო: M.E.N.