სერ ალექს ფერგიუსონს მიაჩნია, რომ "მანჩესტერ იუნაიტედი" ჟოზე მოურინიოს ხელმძღვანელობით პროგრესირებს და არ უმართლებს, რომ "ჩელსის" ტიტულისთვის ბრძოლაში ეცილებოდეს.

75 წლის ფერგიუსონმა "ოლდ ტრაფორდზე" მოღვაწეობა 2013 წელს შეწყვიტა, თუმცა მატჩებს კვლავ ესწრება მაყურებლის რანგში.

"ვფიქრობ, დიდებული სამუშაო გასწია", - განაცხადა შოტლანდიელმა ინტერვიუში.

ჟოზე მოურინიო ფერგიუსონის წასვლის შემდეგ "იუნაიტედის" მესამე მწვრთნელი გახდა დევიდ მოიესისა და ლუი ვან გაალის შემდეგ.

მიუხედავად იმისა, რომ "წითლების" მთავარი მწვრთნელის პოსტზე პრემიერ ლიგაში ჩატარებული სამივე მატჩი მოიგო, მომდევნო შვიდ შეხვედრაში გუნდმა მხოლოდ 6 ქულა დააგროვა.

"იუნაიტედი" ოქტომბრის შემდეგ მეექვსე ადგილზე იმყოფება და მიუხედავად იმისა, იგებს, ფრეს თამაშობს თუ მარცხდება, გუნდი არც მაღლა მიიწევს და არც დაბლა.

მიუხედავად ამისა, ფერგიუსონი გუნდის პროგრესირებას ამჩნევს.

"შესამჩნევია, რომ კლუბს შეეწყო. გუნდი ძალიან კარგად თამაშობს და არ უმართლებს. ექვსჯერ ითამაშა 1-1 ფრე და თითოეულ მატჩში მეტოქეს ჩაგრავდა.

ყველა ეს ფრე რომ არა, ახლა "ჩელსის" ტიტულისთვის შეეცილებოდნენ. სამწუხარო ნაწილია, მაგრამ ამით უნდა იცხოვროს".

მიმდინარე სეზონში მოურინიო ორჯერ გააძევეს ტრიბუნაზე და მის გუნდს "ოლდ ტრაფორდზე" გამარჯვებების მოპოვება უჭირდა.

თუმცა, "ჩელსისა" და "რეალის" ყოფილი მწვრთნელი ახლა უფრო მოდუნებულად გრძნობს თავს.

"იუნაიტედი" ხუთშაბათს "ჰალ სიტის" ლიგის თასის ნახევარფინალის განმეორებით მატჩში 17-მატჩიანი წაუგებელი სერიით შეხვდება. ამ სერიაში ზედიზედ 9 გამარჯვებაც შედის, რომელთაგან ერთ-ერთი სწორედ "ჰალთან" "ოლდ ტრაფორდზე" იქნა მოპოვებული, რაც ფერგიუსონის წასვლის შემდეგ ყველაზე ხანგრძლივი სერიაა.

ფერგიუსონმა განაცხადა: "ჟოზესგან ოდნავ განსხვავებული ვიყავი საფეხბურთო კლუბის შენებისა და მათში ახალგაზრდა ფეხბურთელების ინტეგრირების თვალსაზრისით.

მიუხედავად ამისა, პირველი გუნდი თუ კარგად ვერ ასპარეზობს, ამ პრობლემის გადაჭრის გზა უნდა მოძებნო. ვფიქრობ, ჟოზე ახლა ამას აკეთებს. სეზონის დასაწყისში იყო პერიოდი, როცა გადაწყვეტილების მიღება უჭირდა და ემოციებს ჭარბად ავლენდა. ახლა კი ხედავთ, რომ მშვიდია და თავს აკონტროლებს.

ეს არის ძირითადი დაკვირვება, რასაც გუნდზე ვახორციელებ. გუნდი მწვრთნელის ანარეკლია.

შაბათს "სტოკთან" ბურთთან ბოლო შეხებამდე თამაშობდნენ. არასდროს დანებებულან და თავიანთი ჯილდო რუნის დიდებული გოლის წყალობით მიიღეს.

და დაინახეთ, რა გააკეთა? შუახაზამდე გაიქცა. არავითარი აღნიშვნა. თითქოს ბურთი ნიშნულზე დადო და თქვა, "გაათამაშეთ, მოგებას ვაპირებთ." ეს არის სულისკვეთება, რაც ჟოზემ შექმნა."

წყარო: bbc.com