ჟოზე მოურინიომ უეინ რუნის, რომელმაც "სტოკ სიტისთან" გატანილი გოლით "მანჩესტერ იუნაიტედის" ყველა დროის საუკეთესო ბომბარდირის სტატუსი მიინიჭა, კლუბის ლეგენდა უწოდა.
"ბეტ365" სტადიონზე 31 წლის ფეხბურთელმა შესანიშნავი საჯარიმო დარტყმით "წითლების" რიგებში თავისი 250-ე გოლი გაიტანა 546 მატჩში - ერთით მეტი, ვიდრე ყოფილმა რეკორდსმენმა ბობი ჩარლტონმა.
მატჩის შემდეგ მოურინიომ თავისი კაპიტანი შეაქო: "რეკორდი რეკორდია. ეს არის ინგლისის უდიდესი და მსოფლიოს ერთ-ერთი უდიდესი კლუბის რეკორდი. აქამდე ამ რეკორდის მფლობელი ინგლისური ფეხბურთის ლეგენდა იყო. ახლა კი უეინი გახდა "მანჩესტერ იუნაიტედის" ლეგენდა.
"სტოკის" მთავარ მწვრთნელს, მარკ ჰიუზს, რომელმაც "წითლებთან" ერთად ორჯერ მოიგო პრემიერ ლიგა, სჯერა, რომ რუნის რეკორდს ვეღარავინ დაამხობს.
"საოცარი შედეგია და მას ვერავინ დაამხობს. 40 წელზე მეტი დასჭირდა სერ ბობის რეკორდის დამხობას, რაც დასტურია იმისა, თუ რამდენად მაღალი მნიშვნელობის იყო ეს მიღწევა", - განაცხადა ჰიუზმა.