"მანჩესტერ იუნაიტედმა" მიმდინარე სეზონში მატჩის მიწურულს გოლების გატანას მოუხშირა და ჟოზე მოურინიო აცხადებს, რომ ეს შემთხვევითობა არ არის, რადგანაც მისი გუნდი ყოველთვის ბოლომდე იბრძვის.

"წითელმა ეშმაკებმა" ბოლო მატჩი "ლივერპულთან" ფრედ 1-1 დაასრულეს, როცა ზლატან იბრაჰიმოვიჩმა 84-ე წუთზე გატანილი თავური გოლით ანგარიში გაათანაბრა. ეს ბოლო შემთხვევა იყო, როცა გუნდმა ბოლო თვეებსა და კვირებში ტრადიციად ქცეული მატჩის მიწურულს გატანილი გოლი გაიმეორა.

სხვა მაგალითებს "კრისტალ პალასთან" 88-ე წუთზე იბრას გოლი, ენტონი მარსიალისა და პოლ პოგბას მიერ 85 და 86-ე წუთზე "მიდლსბროს" კარში გატანილი გოლები, პლუს ფელაინის მიერ "ჰალ სიტის" კარის აღება წარმოადგენს.

კარინგტონზე გამართული ვარჯიშის შემდეგ მოურინიო "იუნაიტედის" ოფიციალურ ტელევიზიას ინტერვიუ მისცა, სადაც ხაზი გაუსვა, რომ გვიანდელი გოლები გუნდის თავდადების დამსახურება და მისი სურვილის - მატჩის მიწურულს მეტოქის დაცვაზე ზეწოლა მოახდინოს - შედეგია.

"გვიანდელი გოლებიც გაგვიშვია და როცა "არსენალთან", "ევერტონთან" მატჩი მახსენდება, უნდა ვთქვა, რომ ოთხი ქულა დავკარგეთ ბოლო წუთებზე, რაც არ დაგვიმსახურებია. მაგრამ კი, ბოლო დროს გვიანდელ გოლებს ვიტანთ და ზოგიერთი მათგანი მნიშვნელოვანი იყო: გამარჯვება "კრისტალ პალასთან", მეორე გოლი "ჰალთან", გამარჯვება "მიდლსბროსთან", გოლი "ლივერპულთან".

გუნდი ბოლომდე იბრძვის როცა ბოლომდე იბრძვი, ზურგს გულშემატკივარი გიმაგრებს, რომელთაც სჯერათ, ყველას სჯერა, რომ ეს მოხდება. ასე იმის გამოც ხდება, რომ მცველების შემცირებით ვრისკავ. "მიდლსბროსთან" კრის სმოლინგი გავიყვანეთ თამაშიდან. "ლივერპულთან" ბოლო მატჩში მატეო დარმიანი გავიყვანეთ.

ხშირად ვრისკავთ, ამიტომ ერთ დღეს ცუდად შეიძლება დამთავრდეს ყველაფერი. მაგრამ აგებ ერთი ბურთის სხვაობით თუ ხუთით, ჩემი მენტალიტეტის თანახმად, გულშემატკივარს შედეგისთვის ბრძოლის ხილვა სურს და ამის გამო რისკის გაწევა პრობლემა არ არის. ერთ დღეს თუ ამის გამო დავისჯებით, დავისაჯოთ", - განაცხადა მოურინიომ.

წყარო: manutd.com