"მანჩესტერ იუნაიტედის" მთავარი მწვრთნელი, ჟოზე მოურინიო აცხადებს, რომ მემფის დეპაის იმიჯი პრესის წარმომადგენლებს სრულიად სხვაგვარად აქვთ აღქმული და სინამდვილეში მემფისი ნამდვილი პროფესიონალია.
ჰოლანდიელი ვინგერი მალე ოფიციალურად გახდება "ლიონის" ფეხბურთელი და ბუნებრივია, რომ "სტოკ სიტისთან" მატჩის წინა პრესკონფერენციაზე "იუნაიტედის" მთავარ მწვრთნელს მის შესახებ შეკითხვა დაუსვეს.
"ფანტასტიკური პროფესიონალი იყო. ვინმეს თუ ჰგონია, რომ ვერ გაამართლა, რადგან პროფესიონალურად არ იქცეოდა, ნამდვილად ცდება. ერთია სურათის გადაღება საოცარ მანქანაში ან ტანსაცმელში ვინმესთან ერთად, მაგრამ ეს იმიჯი შეცდომაში შეგიყვანთ. ეს ბავშვი ყველას პატივს სცემდა და უფრო მეტი შანსის მისაღებად შრომობდა, მაგრამ დამწუხრებული იყო, რომ ვერ იღებდა.
როცა მისტერ ვან გაალმა შეიძინა, კარგად ართმევდა თავს. ერთმანეთს ძალიან კარგად იცნობდნენ ეროვნული ნაკრებიდან, მსოფლიო ჩემპიონატზე ძალიან ახალგაზრდამ იასპარეზა, მთელი რიგი უნარები ჰქონდა.
ჰოლანდიაშიც კარგად თამაშობდა; გასაგებია, რომ ჰოლანდიის ჩემპიონატი ასეთივე არ არის, მაგრამ იქ კარგ რამეებს აჩვენებდა. ამ 18 თვეში წარმატებას ვერ მიაღწია, მაგრამ ჯერ ძალიან ახალგაზრდაა. კლუბისთვის მნიშვნელოვანია ამ ნიჭის კონტროლქვეშ აყვანა და გვსურს, რომ "ლიონში" კარგად იასპარეზოს. რატომაც არ უნდა დაბრუნდეს, ის ხომ ყველას მოსწონს".