მართალია, ერიკ ბაიი "მანჩესტერ იუნაიტედში" მხოლოდ ნახევარი სეზონია იმყოფება, მაგრამ "ვილიარეალიდან" შეძენილმა ფეხბურთელმა სურვილი უკვე გამოთქვა, რომ მთელი თავისი კარიერა "ოლდ ტრაფორდზე" გაატაროს.

ბაიი ჟოზე მოურინიოს პირველი შენაძენი გახდა "იუნაიტედში" და "წითლების" რიგებში გატარებულ სადებიუტო სეზონში წარმატებით ასპარეზობასაც ახერხებს, რისი დასტურიც აგვისტოში მის მიერ მოგებული თვის საუკეთესო ფეხბურთელის ჯილდოა.

22 წლის მცველი ამჟამად გაბონში აფრიკის ჩემპიონატზე იმყოფება, სადაც თავის ქვეყნის ნაკრებს, კოტ დ'ივუარს ეხმარება. თავისი პირველი მატჩი მან უკვე ჩაატარა ტოგოს ნაკრების წინააღმდეგ, რომელიც 0-0 დასრულდა და ახლა კონგოს დემოკრატიული რესპუბლიკის წინააღმდეგ პარასკევს გასამართი მატჩისთვის ემზადება.

"იმედი მაქვს, მანჩესტერში მთელ ჩემს სიცოცხლეს გავატარებ. აქ ძალიან ბედნიერი ვარ, რადგან დიდი კლუბია. "იუნაიტედში" თამაში ჩემთვის პატივია და იმედი მაქვს, ჩემი ღვაწლით კლუბის უდიდესი მოთამაშე გავხდები.

პირველი გუნდის ფეხბურთელის სტატუსის შენარჩუნება რთულია, მაგრამ ყოველი მიღებული წამით ვკტბები, რადგან არაჩვეულებრივ კლუბში ვარ და თავს ბედნიერად ვგრძნობ. ვერც კი ვიოცნებებდი უკეთეს რამეზე, ვიდრე "იუნაიტედში" თამაშია. იმედი მაქვს, აქ გატარებული ყოველი დღით დავტკბები".

ბაიიმ ასევე ისაუბრა მოურინიოს ხელმძღვანელობით "იუნაიტედის" მზარდი პოტენციალის შესახებ. გუნდს ამჟამად 16-მატჩიანი წაუგებელი სერია აქვს და შაბათს "სტოკ სიტისთან" მატჩისთვის ემზადება.

"ბევრი ახალი ფეხბურთელი გგვყავს და მწვრთნელიც ახალია. ჯერ კიდევ ხდება გუნდის შერწყმა და კარგი ატმოსფეროს შექმნა, შედეგებიც გვაქვს. ვიცით, რომ მოურინიოს მსგავსი მწვრთნელით ფეხბურთელები მაქსიმუმს გაიღებენ, ამიტომაც მჯერა, რომ ეს გუნდი შორს წავა. მოთამაშეები ერთმანეთს მოედანზეც და მის ფარგლებს გარეთაც კარგად უგებენ".

წყარო: manutd.com