"მანჩესტერ იუნაიტედის" მთავარმა მწვრთნელმა ჟოზე მოურინიომ და "ლივერპულის" მთავარმა მწვრთნელმა იურგენ კლოპმა კვირას გამართულ შეხვედრაში თავიანთი კამათის მიზეზზე ისაუბრეს.

"წითელ ეშმაკებსა" და მერსისაიდელებს შორის მატჩის მიწურულს ანდერ ერერამ და რობერტო ფირმინო მაისურზე მოქაჩვით შეაჩერა. მას შემდეგ, რაც ბრაზილიელმა მეტოქის მოშორება სახეში ხელის ჩარტყმით სცადა, ესპანელი დაეცა. შეხვედრის მთავარმა არბიტრმა მაიკლ ოლივერმა სიტუაციაში გარკვევა მოახერხა და ორივე ფეხბურთელს ყვითელი ბარათი უჩვენა, თუმცა ურთიერთობის გარკვევა მოედნის კიდესთან გაგრძელდა - მატჩის სათადარიგო არბიტრსა და გუნდების მთავარ მწვრთნელებს შორის.



"არ ვიცი, მოურინიოს მინიმუმ ყვითელი ბარათი სურდა. ვფიქრობ, მსაჯმა ჯერ კიდევ მანამდე ჩასტვინა, სანამ რამე მოხდებოდა. რობერტო თავიდან კოჭამდე ფეხბურთელია და თამაშის გაგრძელება სურდა. პასის მიცემა შეეძლო. ერერასთვის ყვითელი ბარათი უნდა მიეცათ და მეტი არაფერი.

ბოლოს კი ყვითელი ბარათი იმან მიიღო, ვისაც ფეხბურთის თამაში უნდოდა. უარესიც შეიძლებოდა, ვინმეს ამ ეპიზოდში ჩახედვა რომ მოენდომებინა. მე და მოურინიო ერთ აზრზე ვერ შევჯერდით", - განაცხადა კლოპმა.

მოურინიომ კი ამ ინციდენტის შესახებ კომენტარის გაკეთებისას განაცხადა, რომ ფირმინოს გაძევება სულაც არ უთხოვია.

"კლოპს ეგონა, რომ მისი ფეხბურთელის გაძევებას ვითხოვდი, მაგრამ ასე არ არის. არავითარი პრობლემა არ იყო. ვფიქრობ, კორექტულ თამაშს ჰქონდა ადგილი. ფეხბურთელები ბოლომდე დაიხარჯნენ ემოციური და პროფესიული თვალსაზრისით და მსაჯი ძალიან კარგად აკონტროლებდა მატჩს. აგრესია შეიმჩნეოდა, მაგრამ ეს კარგია და პრემიერ ლიგის შესანიშნავი რეკლამა იყო მთელი მსოფლიოსთვის".